“Normal insan söyüş söyməz”

Bu fikirləri “Ölkə.Az”a açıqlamasında Azərbaycan Milli Elmlər Akademiyasının (AMEA) Riyaziyyat və Mexanika İnstitutunun direktoru, sabiq Təhsil naziri, YAP Siyasi Şurasının üzvü Misir Mərdanov bildirib. 

İsmayıllı və Qobustan rayonlarında sakinlərlə keçirilən görüşlərdə iştirak və insanlarla söhbət etdiyini vurğulayan M.Mərdanov deyib ki, insanlar prezident seçkilərinə tam hazırdır:

“Xalqımız seçkilərə böyük maraq göstərir. İnsanlar seçkilərdə səslərini verəcəyi namizədi də müəyyənləşdiriblər. Əminəm ki, hər şey tam qaydasında olacaq. Bizim millətimiz çox müdrikdir. Ona görə də Azərbaycan xalqı özlərinin və övladlarının xoşbəxt gələcəyi üçün səs verəcəklər”.

Xaricdən Azərbaycan əleyhinə söyüş kampaniyası aparan şəxslərin hərəkətlərinə də toxunan M.Mərdanov bu cür halların doğru olmadığını söyləyib:

“Şəxsən mənim fikrim odur ki, normal insan nəinki söyüş söyməli, heç bir mənfi fikirlər söyləməməlidir. Ümumiyyətlə, heç kəsin ağızından qeyri-etik sözlər çıxmamalıdır. İstər xaricdə yaşayan, istərsə də Azərbaycanda yaşayan adamlar olsun. İstənilən halda bu cür addımları pisləyirəm. Hər birimiz qarşımızda olan adamlara hörmətlə yanaşmalıyıq. Eyni zamanda qarşımızdakı adamlar da bizə hörmət etməlidir. Bu, hər bir insanın borcudur. Normal insan söyüş söyməz, əksinə, bir-birini dəstəkləyər, imkan daxilində ona kömək edir. Bu mənim qəti mövqeyimdir ki, normal insan söyüş söyməməlidir. Əgər kim söyüş söyürsə, çox səhv edir. Mən xaricdən Azərbaycana qarşı söyüş söyən adamlara tövsiyə edirəm ki, bu cür hərəkətlərdən əl çəksinlər”.

Vasif Həsənli
Ölkə.Az