“Avropalılar Azərbaycana qarşı söyüş söyənləri tanımırlar”

Bunu “Ölkə.Az”a açıqlamasında Avropa Azərbaycanlıları Konqresinin (AAK) prezidenti, Dünya Azərbaycanlıları Əlaqələndirmə Şurasının üzvü Sahil Qasımov bildirib. 

S.Qasımov deyib ki, həmin şəxslərin Azərbaycan əleyhinə keçirdiyi bütün tədbirlərə cavab addımlar atılır:

“Bizdə məlumat var ki, bir qrup radikal gənc aprelin 11-də Berlində Azərbaycan Səfirliyi qarşısında aksiya keçirtməyi planlaşdırır. Bizim bundan xəbərimiz var. Eyni gündə biz də həmin yerdə tədbir keçirəcəyik. Avropa Azərbaycanlıları Konqresi olaraq eyni gündə bizdə sivil yolla öz sözümüzü deyəcəyik”.
S.Qasımov qeyd edib ki, həmin radikal gənclərin bu cür hərəkətləri avropalılar tərəfindən də mənfi qarşılanır:

“Bu cür hərəkətlər avropalılar tərəfindən də xoş qarşılanmır. Avropalılar radikal şəxslərin bu cür hərəkətlərinə müsbət rəy vermirlər. Bunlar o qədər kiçik qrupdur ki, avropalılarda bunlar haqqında təsəvvür belə yoxdur. Avropalılar Azərbaycana qarşı söyüş kampaniyası aparan şəxsləri tanımırlar. Bu gün Avropada yüzlərlə ölkədən bu cür kiçik qruplar fəaliyyət göstərir. Ona görə də avropalıların bunları tanımamaması təbiidir. Ola bilsin ki, bu adamlar kiçik bir çevrədə tanınır. Amma qitə olaraq Avropada tanınmırlar. Hətta, bu insanlar yaşadıqları Avropa ölkələrinin siyasi həyatında belə yoxdur”.

Vasif Həsənli
Ölkə.Az