Mənzil dələduzunun məhkəmə işi
“Ölkə.Az”ın xəbərinə görə, sabah cinayət məclləsinin 178.3.2-ci maddəsi ilə təqsirləndirilən Həsənov Əkbər Qərib oğlunun hazırlıq iclası hakim Mayıl Bayramovun sədrliyi ilə keçiriləcək.
Xatırladaq ki, Ə.Həsənov 2016-cı ilin mart ayında həbs edilib. Belə ki, 50 yaşlı Əkbər Qərib oğlu Həsənovun saxlanılmasına rayon ərazisində yaşayan vətəndaşlardan birinin şikayət ərizəsi səbəb olub. Şikayətçi yeni inşa edilən binalardan birində Əkbər Həsənovdan mənzil alıb. Əldə edilmiş razılığa əsasən, mənzilin pulu hissə-hissə ödənilib. Pul tam ödənilsə də, Əkbər Həsənov satdığı mənzilin ödəniş qəbzini vətəndaşa verməyib.
Saxlanılaraq Abşeron Rayon Polis İdarəsinə gətirilən Əkbər Həsənov bildirib ki, tikinti şirkətləri ilə müqavilə bağlayaraq, onlara müxtəlif xidmətlər göstərir.
Göstərilən xidmətlərin müqabilində isə tikinti şirkətləri ona pul yox, mənzil verirlər:
“İşlərim dayandı. Tikinti şirkətləri qarşısında öhdəliyimi yerinə yetirə bilmədiyimə görə pulumu ala və mənzilə görə ödənilən pulun qəbzini verə bilmədim”
Sahibkarın sözlərinə görə, şikayətçi ona vaxt versə, o, müqavilə əsasında gördüyü işi tikinti şirkətinə təhvil verərək, mənzili sənədləşdirəcək. Abşeron Polis İdarəsindən verilən məlumata görə, Həsənovun əməlindən bir neçə nəfər zərər çəkib.
