Tramp təsdiqlədi: “Mayk Pompeo Kim Çen İnlə görüşüb”
ABŞ prezidenti Donald Tramp mətbuatda gedən “Pompeo Şimali Koreya rəsmiləri ilə görüşüb” başlıqlı xəbəri təsdiqləyib.
“Ölkə.Az” xəbər verir ki, Tramp bu barədə Tvitter səhifəsində “Mayk Pompeo ötən həftə Kim Çen İnlə görüşüb” cümləsini yazıb.
ABŞ prezidenti Donald Trampla Şimali Koreya lideri Kim Çen İn arasındakı gərginlik azalmağa başlayıb. Bu gün ABŞ mətbuatında yazılan xəbərə əsasən, Tramp tərəfindən bir müddət əvvəl XİN rəhbəri kimi namizədliyi irəli sürülən Mayk Pompeonun Şimali Koreyaya səfər etdiyi bildirilirdi.
Tramp isə Tvitter səhifəsində yazıb:
“Mayk Pompeo ötən həftə Kim Çen İnlə görüşüb. Görüş müsbət şəraitdə keçib. Zİrvə görüşünün detalları müzakirə edilib. Nüvə silahlarının məhv edilməsi həm dünya, həm də Şimali Koreya üçün yaxşı olacaq”.
Hikmət Həsənov
Ölkə.Az
