Hərbi formada gəzən “polkovnik”in cinayətləri
“Ölkə.Az”ın xəbərinə görə, cinayət məcəlləsinin 178.2.2-ci (dələduzluq; təkrar törədildikdə) maddəsi ilə həbs edilən Cəfərov Rizvan Rəcəb oğlunun məhkəmə prosesi Xətai Rayon Məhkəməsində keçiriləcək. Hakim Bəxtiyar Məmmədovun sədrliyi ilə keçirilən məhkəmə baxışı aprel ayının 24-ə təyin edilib. Cinayət işində Qasımov Tofiq Əşrəf oğlu və Mamedov İkram Əlihüseyn oğlu zərərçəkmiş qismində tanınıb.
Qeyd edək ki, R. Cəfərov ötən ilin dekabr ayında Xətai Rayon Polis İdarəsinin əməkdaşları tərəfindən həbs edilib. DİN mətbuat xidmətindən verilən məlumata görə, Xətai Rayon Polis İdarəsinə müraciət edən paytaxt sakini Tofiq Qasımov bildirib ki, avqustun 6-da özünü hüquq-mühafizə orqanlarının polkovnik rütbəli zabiti kimi təqdim edən əvvəldən tanıdığı Rizvan adlı şəxs tərəfindən dələduzluq yolu ilə aldadılaraq 11000 manat pulu mənimsənilib.
Şikayətçi ərizəsində həmin şəxsin pulu ondan oğlunu universitetlərdən birinin hüququ fakültəsinə düzəldəcəyi adı ilə aldığını qeyd edib. Həyata keçirilən əməliyyat-axtarış tədbirləri nəticəsində dələduzluq etməkdə şübhəli bilinən şəxs saxlanılıb.
Xətai RPİ-dən bildiriblər ki, əvvəllər Cinayət Məcəlləsinin dələduzluq, hədə-qorxu ilə tələb etmə, silah gəzdirmə və sağlamlığa zərər vurma maddələri ilə məhkum olunan Cəfərov Rizvan Rəcəb oğlu saxlanılıb. Saxlanılan zaman onun əynində Ədliyyə Nazirliyi Penitensiar Xidmətinin işçisi olmadığı halda həmin orqanın xüsusi geyim forması olub.
Faktla bağlı Xətai Rayon Polis İdarəsinin İstintaq Şöbəsində Cinayət Məcəlləsinin müvafiq maddəsi ilə cinayət işi başlanılıb, araşdırmalar aparılır. Polis əməkdaşları dələduzluq etməkdə şübhəli bilinən Rizvan Cəfərovun digər analoji cinayətlərdə iştirak etdiyini də istisna etmir.
