Deputat: “Novruz Məmmədovun cəmiyyətdə böyük nüfuzu var”

“Novruz Məmmədov Ulu Öndər Heydər Əliyev məktəbinin ən dəyərli müdavimlərindən biridir. Novruz müəllim uzun illər Ümummilli Liderimizə xidmət edib. 2003-cü ildən isə cənab prezident İlham Əliyevin yanında çalışır”.

Bu fikirləri “Ölkə.Az”a açıqlamasında Milli Məclisin deputatı, Yeni Azərbaycan Partiyasının (YAP) Nəsimi rayon təşkilatının sədri Məlahət İbrahimqızı bildirib.

Məlahət İbrahimqızı Novruz Məmmədovun xalq arasında böyük nüfuza malik olduğunu söyləyib:

“Novruz müəllim Azərbaycan cəmiyyətində və ictimaiyyət arasında çox böyük nüfuza və yüksək dəyərlərə malik insandır. Mənə də qismət olub ki, Novruz müəllimlə 20 günə yaxın vaxtda ABŞ-da səfərdə olmuşam. Həmin səfər zamanı Novruz Məmmədovun Azərbaycanı çox yüksək səviyyədə təmsil etmək bacarığının şahidi olmuşam. Həmin səfər zamanı Azərbaycan nümayəndə heyətinə o başçılıq edirdi, ölkəmizi çox yüksək səviyyədə təmsil edirdi, Azərbaycanın dünyada və regionda olan rolunu, Qarabağ münaqişəsi ilə bağlı həqiqətləri tanıdırdı. Həqiqətən də Novruz müəllim Azərbaycanı yüksək səviyyədə təqdim etmək bacarığı olan diplomatdır”.

Deputat əlavə edib ki, Novruz Məmmədov ölkə başçısının Qarabağ və digər məsələlərlə bağlı verdiyi tapşırıqları qüsursuz yerinə yetirmək bacarığına malikdir:

“Novruz müəllim iştirak etdiyi beynəlxalq tədbirlərdə hər zaman Ermənistanın işğalçılıq siyasətini dəfələrlə ifşa edib, Azərbaycan dövlətinin xarici və beynəlxalq əlaqələrinin inkişafına öz töhfəsini verib”.

Vasif Həsənli
Ölkə.Az