Hakimi təhqir edən qatilin məhkəməsi

“Ölkə.Az”ın xəbərinə görə, hakim Emin Axundovun sədrliyi ilə keçirilən məhkəmə prosesində cinayət məcəlləsinin 289.2-ci (Məhkəməyə hörmətsizlik etmə; eyni əməllər hakim barəsində törədildikdə) maddəsi ilə təqsirli bilinən Namazov Arzu Ziyad oğlunun hazırlıq iclası keçiriləcək. Qeyd edək ki, cinayət işində zərərçəkmiş qismində Gəncə Ağır Cinayətlər Məhkəməsinin hakimi Qasımov Zabil Bəhmən oğlu tanınıb. 

Xatırladaq ki, bu ilin fevral ayının 23-də Gəncə Ağır Cinayətlər Məhkəməsində Alıyev Sakit Tofiq oğlunu qətlə yetirən Namazov Arzu Ziyad oğluna və Mürsəlov Elşən Zirəddin oğluna hökm oxunub. 

Hakim Zabil Qasımov sədrliyi ilə keçirilən məhkəmədə təqsirləndirilən şəxs A.Namazov 2017-ci il 1 may tarixdə, saat 23 radələrində, sərxoş vəziyyətdə tanışı Elşən Mürsəlovun idarə etdiyi avtomobillə şəhərin Kəpəz rayonu, Məhsəti qəsəbəsində hərəkətdə olarkən yol hərəkəti qaydalarını pozaraq Alıyev Sakit Tofiq oğlunun idarə etdiyi 21 BX 026 dövlət qeydiyyat nömrə nişanlı, Nissan “X-Trail” markalı avtomobilin hərəkətinə maneə törədib. 

S.Alıyev yaxınlaşaraq avtomobili təhlükəli idarə edib qəza şəraiti yaratması barədə E. Mürsəlova iradını bildirib. Bu səbəbdən onların arasında mübahisə yaranıb. S.Alıyev baş vermiş hadisə barədə polisə müraciət edəcəyini bildirib. Bu sözlərdən hiddətlənən E.Mürsəlov və onun sərnişini A.Namazov S.Alıyevə  hücum edərək onu döyüblər. Sonra A.Namazov üzərində gəzdirdiyi bıçaqla S.Alıyevi bıçaqlayaraq qətlə yetirib. 

Keçirlən məhkəmədə Mürsəlov Elşən Zirəddin oğlu ilə birlikdə bir qrup şəxs halında Sakit Alıyevi xuliqanlıq niyyəti ilə qəsdən öldürmüş şəxslərə höküm oxunaraq, Namazov Arzu Ziyad oğlu Azərbaycan Respublikası Cinayət Məcəlləsinin 120.2.1 (Qəsdən adam öldürmə), 120.2.2 (Xuliqanlıq niyyəti ilə adam öldürmə) və 221.3-cü (Xuliqanlıq, silahdan və ya silah qismində istifadə edilən əşyaları tətbiq etməklə törədildikdə) maddələri ilə təqsirli bilinərək 20 il, Mürsəlov Elşən Zirəddin oğlu isə Azərbaycan Respublikası Cinayət Məcəlləsinin 120.2.1, 120.2.2 və 221.2.1-ci (Bir qrup şəxs və ya təkrar tərəfindən törədildikdə)maddələri ilə təqsirli bilinərək 16 il 6 ay müddətinə azadlıqdan məhrum edilib.

Hökmün ağırlığından narazı qalan Arzu Namazov məhkəmə zalında hakimi təhqir edib. Təhqirlə razılaşmayan Z.Qasımovda ölçü götürülməsi barədə aidiyyatlı orqanlara müraciət edib.