Elmira Süleymanova: “Aliment fondu məsələsi illərdir həll edilmir”
“Ölkə.az” xəbər verir ki, bu sözləri Ombudsman Elmira Süleymanova Milli Məclisin plenar iclasında hesabat məruzəsi ilə çıxışı zamanı deyib.
Ombudsman illərdir aliment fondunun yaradılmamasının yaratdığı problemlərdən də danışıb:
“Fəaliyyətim dövründə əhalinin problemlərinin həllinə 600-dən çox müraciət olub, onların yarısı həllini tapıb. Pozulmuş hüquqların bərpası istiqamətində dövlət qurumları ilə səmərəli əməkdaşlıq qurulub. Əvvəlki illə müqayisədə yalnız müraciətlərin sayında deyil, formasında da dəyişiklik müşahidə edilib.
Məhkəmə qərarlarından narazılıq, iştirakçılara qarşı süründürməçşilik halları narazılıqla bağlı da ombudsman sturukturuna müraciətlər olub. Bəzən məhkəmə qərarının vaxtında göndərilməməsi həmin şəxslərin təkrar məhkəməyə müraciət etmək hüququndan məhrum edib. Aliment üzrə cərimə və ya inzibati cəza məsələsi də problemi həll etmədi, daha da ağırlaşdırdı. Çünki polis tərəfindən saxlanılan şəxsin aliment ödəmə imkanı daha da məhdudlaşdırılıb. Alimentin ödənilməsinə dəstək məqsədilə Aliment fondu və ya başqa səmərəli mexanizm tətbiq edilə bilər. Aliment fondu məsələsi illərdir həllini tapmadığından başqa bir üsulun tətbiqi səmərəli ola bilər”.
E.Süleymanova 65 yaşı tamam olan işləmək qabiliyyəti olan şəxslərə əlavə 1 il işləmək imkanı yaradılması məsələsinə də yenidən baxılmasını təklif edib:
“Hesab edirəm ki, 1 il azdır. Ona görə də ilk mərhələdə bu iki il ola bilər. Daha sonrakı mərhələdə ehtiyac olarsa, müddət 1 il də artırıla bilər”.
Ombudsman bildirib ki, bir sıra sahələrdə olduğu kimi, işğaldan azad edilən ərazilərdə də canlanma müşahidə edilib:
“Bu gün Cocuq Mərcanlıda həyat dəyişib. Bir neçə il əvvəl orada müharibə şəraiti var idi, hər yer dağılmışdı, bu gün orda qaynar həyat var”.
Vasif Həsənli
Ölkə.Az
