Qaynanasına silah çəkən keçmiş məhkum hakim qarşısında
Xətai Rayon Məhkəməsində qaynanasının üstünə silah çəkən kürəkənin məhkəməsi başlayıb.
“Ölkə.Az”ın məlumatına görə, hakim Nazim Tağıyevin sədrliyi ilə keçirilən məhkəmə prosesində cinayət məcəlləsinin 228.1-ci (qanunsuz silah saxlama) maddəsi ilə təqsirləndirilən Zöhrabov Polad Muxtar oğlunun anket məlumatları dəqiqləşdirilib.
Xatırladaq ki, bu il martın 10-də Xətai rayonu ərazisində Bakı şəhər sakini Svetlana Zöhrabova Xətai RPİ-nin 34-cü Polis Bölməsinə ərizə ilə müraciət edərək bildirib ki, martın 10-da əri Polad onun anası Zümrüd Paşayevanın yaşadığı evə gedərək tapança ilə onu hədələyib. Bölmə əməkdaşlarının keçirdikləri əməliyyat tədbirləri nəticəsində P.Zöhrabov saxlanılıb.
Əvvəllər məhkum olunmuş P.Zöhrabovdan tapança və 5 ədəd patron götürülüb.
