Azərbaycan və Türkiyə arasında ticarətdə dollardan imtina oluna bilər

Azərbaycan prezidenti İlham Əliyev Türkiyədə rəsmi səfərdədir.

“Ölkə.Az” xəbər verir ki, Türkiyə-Azərbaycan Yüksək Səviyyəli Əməkdaşlıq Şurasının7-ci iclasından sonra tərəflər arasında bir sıra sənədlər imzalanıb. İmzalanma mərasimindən sonra İlham Əliyev və Rəcəb Tayyip Ərdoğan birgə mətbuat konfransı verib.

Konfransda çıxışı zamanı İlham Əliyev Azərbaycanın Türkiyə iqtisadiyyatına qoyduğu sərmayədən danışıb. Prezident bildirib ki, Azərbaycan tərəfindən Türkiyə iqtisadiyyatına 14 milyard dollar sərmayə qoyulub. Türkiyə tərəfi isə Azərbaycan iqtisadiyyatına 12 milyard dollar sərmayə yatırıb.
Prezident İlham Əliyev TANAP layihəsinin və açılışı olacaqSTAR neft emalı zavodunun bu imkanları artıracağını vurğulayıb.
Türkiyə lideri Ərdoğan isə çıxışında iki ölkə arasında ticarət və iqtisadi əlaqələrin inkişafının vacib olduğunu bildirib.

“Bu gün vacib addım atdıq. Yaxın gələcəkdə yeni layihələr də həyata keçirəcəyik. İyun ayında TANAP layihəsi start götürəcək. Təbii ki, ən önəmlisi iqtisadi sahədə yerli və milli valyutaya keçişimiz olacaqdır”, - deyə Ərdoğan bildirib.