Qurban Yetirmişli: "Böyük zəlzələlər gözlənilmir"

Son günlər bölgələr, o cümlədən Xəzər dənizində zəlzələ ocaqlarında xüsusi aktivlik müşahibə olunmaqdadır. Ardıcıl baş verən təkanlar əhali arasında müəyyən suallar yaradıb.
Aktivlik böyük zəlzələyə səbəb ola bilərmi?

Mövzu ilə əlaqədar Ölkə.az-a danışan Respublika Seysmoloji Mərkəzinin direktoru Qurban Yetirmişli bildirdi ki, xırda təkanlar ciddi heç nəyə səbəb ola bilməz.

"Düzdür, ocaqlarda aktivləşmə var, amma bunlar zəif təkanlardır. Yəni bu cür təkanlar çox olur. Bəzən gün ərzində ayrı-ayrı bölgələrdə 10-a yaxın bu cür zəif təkanlar olur. Nəzərinizə çatdırım ki, 3.5 baldan yuxarı olanlar bizim, eləcə də avropa saytlarında yerləşdirilir. Yəni, mən deməzdim ki, bu təkanlar nəsə qorxulu bir hadisədən xəbər verir. 

Dərinlik qırılması aktiv dərinlik qırılmasıdır. Yəni, Xəzərboyu həmişə xırda təkanlar baş verir. Mən hesab etmirəm ki, hər hansı bir dağıdıcı zəlzələdən söhbət gedə bilsin. Təkanların baş verməsi sadəcə enerji boşalması deməkdir. Qısacası, elə də güclü bir aktivlik yoxdur".

Qeyd edək ki, hazırda Azərbaycanda 35 seysmik stansiya fəaliyyət göstərir və ən xırda təkanlar da qeydə alınır.

Fatimə İbrahimova
Ölkə.az