"Bakıelektrikşəbəkə": "Bakı qara və çovğuna hazırdır"

"Bakıelektrikşəbəkə” ASC qarın gəlməsini gözləmədən hazırlıq tədbirlərinə yekun vurub.

Bu sözləri Ölkə.az-a "Bakıelektrikşəbəkə” ASC-nin mətbuat xidmətinin rəhbəri Tanrıverdi Mustafayev deyib. O, hava şəraitinin kəskin dəyişməsi ilə əlaqədar “Bakıelektrikşəbəkə” tərəfindən görülən işlər barədə də danışıb.

"Həmişə olduğu kimi bu il də qışqabağı bütün tədbirləri həyata keçirmişik və narahatçılığa heç bir əsas yoxdur.

Son iki il ərzində aparılan yenidənqurma işləri ilə bütün ehtiyac olan tədbirlər həyata keçirilib. Buraya təkcə transformatorların yağının dəyişdirilməsi və ya yenidən inşa edilməsi yox, həm də ayda bir dəfə obyektlərin təftiş olunması da daxildir. Əvvəllər belə təftişlər zamanı uzunmüddətli fasilələr yaranırdı, lakin indi yaradılan dairəvi sxem sayəsində belə fasilə heç bir neçə dəqiqə də çəkmir.

“Bakıelektrikşəbəkə” tərəfindən həyata keçirilən tədbirlər sayəsində bu qış əvvəlki illərdən fərqli olaraq Bakı şəhərinin işıqla təminatında heç bir problem olmayacaq. İstisna hallar olarsa, 199 nömrəli qaynar xəttimiz 24 saat istifadəçilərimiz xidmətindədir”.