Gəncədə II Milli Sənaye Mühəndisliyi Forumu keçirildi
Azərbaycan Texnologiya Universitetindən "Ölkə.Az"a verilən məlumata görə, forumda İqtisadiyyat Nazirliyi yanında Kiçik və Orta Sahibkarlığın İnkişafı Agentliyinin (KOSİA) icraçı direktoru Orxan Məmmədov mövzu ilə bağlı çıxış edib.
O bildirib ki, Azərbaycanda sənaye potensialının yüksəldilməsi üçün elmi-innovativ biznes ideyalarının istehsalatda tətbiqi vacibdir. İcraçı direktorun sözlərinə görə, sahibkarlığın inkişafı üçün daha əlverişli biznes mühiti yaratmağın ilkin şərti kiçik və orta sahibkarlığın iqtisadiyyatda rolunun və rəqabətqabiliyyətliliyinin artırılmasıdır. Rəhbərlik etdiyi agentliyin müvafiq istiqamətdə silsilə iş aparacağını deyən Orxan Məmmədov elm və ali təhsil ocaqları ilə əməkdaşlıq edəcəklərini də bildirib.
O qeyd edib ki, KOSİA şəffaf və müasir idarəetmə sisteminə malik Azərbaycan Texnologiya Universiteti ilə əməkdaşlıq etməkdə maraqlıdır.
Forum çərçivəsində Kiçik və Orta Sahibkarlığın İnkişafı Agentliyi ilə Azərbaycan Texnologiya Universiteti arasında əməkdaşlıq haqqında memorandum imzalanıb.
Ölkə.Az
