Keçmiş deputatlığa namizəd dələduzluqda ittiham olunur

Bakı Ağır Cinayətlər Məhkəməsində külli miqdarda dələduzluqda təqsirli bilinən Ağaevli Əli Hacı oğlu və Kərimov Fuad Saday oğlunun məhkəmə prosesi başlayır.

“Ölkə.Az”ın xəbərinə görə, may ayının 10-da hakim Samir Əliyevin sədrliyi ilə təqsirləndirilən 2 şəxsin məhkəmə prosesinin hazırlıq iclası keçiriləcək.

Cinayət işində zərərçəkən qismində Mehdiyev Qabil Tücarət oğlu tanınıb.

Qeyd edək ki, təqsirləndirilənlərdən Ağaevli Əli Hacı oğlu həm prezidentliyə, həm də deputatlığa namizəd olub.

Belə ki, Milli Azadlıq Hərəkatının fəallarından, Dünya Azərbaycanlıları Konqresinin yaradıcılarından olan fəal diasporçu Ağaevli Əli Hacı oğlu 2015-ci ildə 34 saylı Xətai ikinci seçki dairəsindən deputatlığa namizəd olub.

2007-ci ildən Hüquqi, İqtisadi və Sosial Tədqiqatlar Mərkəzinin direktoru vəzifəsində çalışıb.

2008-ci ildə "Yeni İslahatçılar" Təşəbbüs Qrupundan Azərbaycan Respublikası Prezidentliyinə namizədliyini irəli sürüb.

Əli Hacı Ağaevli Azərbaycan Ədəbiyyatı və İctimaiyyətində sufi şair kimi tanınır. "Ruhumuzun nəğmələri" (1996), "Ruhumuz çəkər göyə" (1997 Ankara, Türkiyə), "Qoyun qisas alan gəlsin" (1998), "Bu da mənəm ilahi!" (2005), "Dünyadan qadın iyi gəlir" (2007 Təbriz) şeirlər kitabının, "Avesta və müasir dünya adlı elmi-fəlsəfi" əsərin müəllifidir.

2008-ci ildə Mehriban Əliyevanın başcılığı ilə yaradılmış "Avrasiya Araşdlırmalar Mərkəzi”nin rəy sorğularına əsasən, Azərbaycan Respublikasının ictimai-siyasi və mədəni həyatındakı aktiv fəaliyyətinə görə "İlin Adamı" elan olunub, 2010-cu ildə Əli Hacı Ağaevli Milli Mətbuatımızın 135 illiyinə həsr olunmuş tədbirdə fəxri diplom ilə təltif olunub, 2012-ci ildə yenidən "Avrasiya Araşdlrmalar Mərkəzi”nin Respublikanın ictimai-siyasi və mədəni həyatındakı aktiv fəaliyyətinə görə "QIZIL KÜRƏ” milli mükafatına, Türkiyə Respublikasının "Avrasiya qəzetçilər dərnəyi"nin Türkiyə-Azərbaycan iki dost ölkə arasında diaspora və informasiya əlaqələrində göstərdiyi xidmətlərə görə fəxri diplomuna, Türkiyə və Azərbaycana qarşı erməni lobbisinə qarşı onların yalanlarını ifşa etməkdə və dünya ictimaiyyətinə çatdırmaqda maddi-mənəvi, həm də misilsiz xidmətlərinə görə Turkiyə Cümhuriyyəti dövlətinin "Qızıl Ödülü"nə layiq görülüb.