Azərbaycan XİN-dən Paşinyanın Qarabağla bağlı bəyanatına cavab

"Ermənistanda yeni seçilmiş baş nazir Nikol Paşinyanın Dağlıq Qarabağ münaqişəsi haqqındakı açıqlaması cavabdan daha çox böyük suallar doğurur və anlaşılmır".

"Ölkə.Az" "Ria Novosti"yə istinadən xəbər verir ki, bu sözləri Azərbaycan Xarici İşlər Nazirliyinin mətbuat xidmətinin rəhbəri Hikmət Hacıyev deyib.

"Bu nədir? Sadəlövhlükmü, yoxsa mövzu barədə məlumatlı olmamaqmı? Bəlkə də, hamısıdır. Yaşayarıq, görərik", - deyə XİN rəsmisi əlavə edib.

H.Hacıyev vurğulayıb ki, Ermənistanda Serj Sarkisyan hakimiyyətinə qarşı etirazlar başlayanda rəsmi Bakı Yerevanda proseslərə ayıq başla yanaşan siyasi qüvvənin hakimiyyətə gələcəyinə ümid edirdi: "Hər halda Azərbaycan prosesin başlanğıcında bəyan etmişdi ki, regionda baş verən hadisələrə ayıq qiymət verən və sağlam düşünən bir qüvvənin hakimiyyətə gələcəyinə ümid edir".

Xatırladaq ki, mayın 8-də Nikol Paşinyan Ermənistanın baş naziri seçilib. Baş nazir olmamışdan qabaq o, Azərbaycan hökuməti ilə Dağlıq Qarabağ münaqişəsinin həllinə dair danışıqlar aparmağa hazır olduğunu bəyan edib. Ancaq o, bunun üçün Dağlıq Qarabağdakı separatçı rejimin də danışıqlarda iştirak etməli olduğunu şərt kimi qarşıya qoyub.

Ölkə.Az