Həbsdə olan xanım redaktor azadlığa çıxmaq istəyir

Bakı Apellyasiya Məhkəməsi “Naxçıvan Press”in baş redaktoru Sevinc Oruc qızı Gözəlovanın apellyasiya şikayətinə baxacaq.

“Ölkə.Az”ın məlumatına görə, S.Gözəlova “AR CM-də dəyişiklər edilməsi haqqında” 20 oktyabr 2017-ci il tarixli Qanunun tətbiqi qərarından apellyasiya şikayəti verib. Dələduz redaktorun məhkəmə prosesinə hakim Qail Məmmədov sədrlik edəcək.

Xatırladaq ki, 2009-cu ildə Sevinc Gözəlova Cinayət Məcəlləsinin 178.2.3-cü (şəxs tərəfindən öz qulluq mövqeyindən istifadə etməklə dələduzluq etmək) maddəsi ilə ittiham olunaraq Ağır Cinayətlərə Dair İşlər üzrə Məhkəmənin hökmü ilə 7 il müddətinə azadlıqdan məhrum edilib. İttihama görə, o, 34 nəfər vətəndaşı aldadaraq pullarını və qızıllarını mənimsəyib.

Baş redaktor barəsində çıxarılmış hökmdən narazı qalan Baş Prokurorluq hökmdən apellyasiya protesti verib və həmin ilin iyun ayında Bakı Apellyasiya Məhkəməsi protesti qismən təmin edib və Sevinc Gözəlovanın cəzasını bir il artıraraq onun barəsində 8 illik həbs cəzasına dair hökm çıxarıb.