Həmyerlisini öldürüb, maşınını yandıran Ağstafa sakini hakim qarşısında

Gəncə Ağır Cinayətlər Məhkəməsində həmyerlisini qətlə yetirən şəxsin məhkəməsi başlayır.

“Ölkə.Az”-ın xəbərinə görə, Elçin Məmməd oğlu Mustafayevin məhkəmə prosesinin hazırlıq iclası may ayının 11-də hakim Sevindik Əzizovun sədrliyi ilə keçiriləcək.

Qeyd edək ki, ağır cinayət hadisəsi ötən ilin son günlərində Ağstafa rayonunun Xətai kəndində baş verib.
İttiham aktına görə, Gəncə sakini 1977-ci il təvəllüdlü Samir Fikrət oğlu Əliyevin həmyerlisi, 1981-ci il təvəllüdlü Elçin Mustafayevlə avtomobildə mübahisəsi düşüb.

İnsident nəticədə sonuncu S.Əliyevi qətlə yetirərək sonradan ona məxsus "VAZ-2104" markalı avtomobili təxminən 1,5 kilometr kənarda yandırıb.
Məhkəmə Tibbi Ekspertiza və Pataloji Anatomiya Birliyinin Ağstafa rayon şöbəsində aparılan ekspertiza nəticəsində məlum olub ki, meyitin boğaz nahiyəsində bir, kürək nahiyəsində isə bir neçə bıçaq xəsarəti var.

İlkin məlumata görə, qətlə yetirilən 1977-ci il təvəllüdlü Samir Fikrət oğlu Əliyev "Embawood" firmasının Gəncə şəhərində yerləşən mağazalarının birində çalışıb.

Hadisədən sonra izi itirmək məqsədi ilə avtomobili yandıran E.Mustafayev ölkədən qaçaraq Gürcüstana keçməyə müvəffəq olub.
Ancaq isti izlərlə keçirilən əməliyyat-axtarış tədbirləri nəticəsində E.Mustafayev qonşu ölkədə saxlanılaraq Ağstafa rayon prokurorluğuna təhvil verilib.
Faktla bağlı Ağstafa Rayon Prokurorluğunda 120.1 (Qəsdən adam öldürmə) maddəsi ilə cinayət işi başlanıb, araşdırmalar davam etdirilir.