“İnter”dən ayrılacaq ilk futbolçu məlum oldu

Qış təlim-məşq toplanışına hamıdan erkən başlayan “İnter” transfer məsələsində tələsmək istəmir.

 Antalyada hazırlıq keçən “bankirlər” hələ ki, heç bir futbolçusu ilə yollarını ayırmayıb.

Hələlik yalnız Əfran İsmayılov və Yussef Fenniçi heyətinə cəlb edən paytaxt təmsilçisi daha iki əcnəbi oyunçu transfer etməyi düşünür. Transfer məsələləri ilə məşğul olan “İnter”in idman direktoru Rolan Vroomans ölkəsi Hollandiyada bir neçə oyunçu ilə danışıq aparır.

Bundan əlavə, hələlik bir futbolçunun klubdan göndərilməsi gündəmdədi. Belə ki, ötən yayda “Sumqayıt”dan alınan Mirzağa Hüseynpur çətin ki, mövsümü “İnter”in oyunçusu kimi başa vursun. Çünki baş məşqçi Kaxaber Sxadadze özünü doğrulda bilməyən gənc yarımmüdafiəçinin xidmətində artıq maraqlı deyil. Bakılılar Hüseynpuru icarəyə verməyin də əleyhinə deyillər.

Qeyd edək ki, Mirzağa Hüseynpurun “İnter”lə müqaviləsi mövsümün sonuna qədərdi.(APAsport)

Ölkə.Az