Məktəb direktoru və müavini böhtana görə məhkəmə qarşısında

“Ölkə.Az”ın məlumatına görə, Mirzəliyev Tural Elmi oğlu və Mirzəliyeva Aybəniz Mirzəxan qızı barəsində xüsusi ittiham qaydasında cinayət məcəlləsinin 147.1 (böhtan) maddəsi ilə məhkəmə prosesinin hakim Mətanət Hacıyevanın sədrliyi ilə hazırlıq iclası keçiriləcək. 

Qeyd edək ki, bu ilin fevral ayında adıçəkilən şəxslərlə məşhur aktyor Rza Rzayev arasında qalmaqal yaranıb. Belə ki, direktor R.Rzayevin bacısını- məktəbin direktor müavini Zeynəb Rzayevanı işdən azad edib. Səbəb kimi isə direktor müavinlərinin vəzifə səlahiyyətlərinin bölgüsündə II yarımildən etibarən dəyişiklik ediləcəyini göstərib. Z.Rzayeva isə bu qərara etiraz edib. Direktorla onun arasında yaranan mübahisəyə gəlincə isə, Zeynəb Rzayeva bildirib ki, direktor əvəzi Tural Mirzəyev dəfələrlə gənc xanım müəllimələri otağına cağıraraq onların adının mənası ilə maraqlanıb. Bu isə həmin müəllimələrin narazılığna səbəb olub. Sonra isə Rza Rzayev məktəb direktorunun yanına gələrək onunla mübahisə edib. Bundan əlavə, o da məlum olub ki, direktor müavini Zeynəb Rzayeva müəllimlərdən pul alındığını iddia edərək, müvafiq qurumlara müraciət edib. Məsələ ilə bağlı Bakı Şəhər Təhsil İdarəsi də məlumat yayıb. Məlumatda bildirilib ki, 220 nömrəli məktəb-liseydə idarə əməkdaşının iştirakı ilə müəllimlərlə iclas keçirilib və müəllimlər tərəfindən müvafiq iddiaların tamamilə əsassız olduğu bildirilib.

Xatırladaq ki, təlim-tərbiyə işləri üzrə direktor müavini Aybəniz Mirzəliyevanın qardaşı 210 saylı məktəbin keçmiş direktoru olub, rüşvət üstündə işdən çıxarılıb.