Şirkətin 70 minini oğurlayan şəxslərin kimliyi bilindi
Mingəçevirdə şirkətlərin birində işləyən Elçin Abdullayev aprelin 30-da polisə müraciət edərək tanımadığı 2 nəfərin onu vuraraq içərisində şirkətə məxsus pul olan çantasını aldıqlarını bildirib.
"Ölkə.Az"ın DİN-ə istinadən verdiyi xəbərə görə, araşdırmalarla məlum olub ki, saat 7 radələrində 2 nəfər şəhər ərazisindəki MMC-lərin birində hasilatçı (ekspeditor) vəzifəsində çalışan E.Abdullayevi evinin girişində fənərə oxşar alətlə vuraraq şirkətə məxsus içərisində 70.000 manat olan çantanı əlindən alaraq qaçıblar. Faktla əlaqədar cinayət işi başlanılıb.
Cinayəti törətməkdə şübhəli bilinən şəxslər müəyyən ediliblər. Basqınçılardan biri – şəhər sakini Kənan Vəliyevin yaşadığı evdən 16 min manata yaxın pul, 1 ədəd beşbarmaq və 2 ədəd bıçaq aşkar edilərək maddi sübut kimi götürülüb.
