“Nazir əhali ilə şəxsən görüşəndə mövcud problemlər daha tez həll olunur”

V.Əhmədov “Ölkə.Az”a açıqlamasında bildirib ki, əslində bütün dövlət məmurları vətəndaşlarla bu cür görüşlər keçirməlidir:

“Misal üçün, mən millət vəkili kimi hər həftə camaatla görüşürəm, onları dinləyirəm. Hesab edirəm ki, nazirlər də bu cür görüşlər keçirməlidir. Dövlət başçısı onları vəzifələrə təyin edir ki, əhalinin arasında olsunlar, insanların problemlərini öyrənsinlər. Nazirlər öz sahələrinin inkişafı ilə məşğul olmaq üçün həmin vəzifələrə təyin olunurlar. Cənab prezident nazir təyin etdiyi insanların qarşısında müəyyən vəzifələr və məqsədlər qoyur ki, ciddi irəliləyişlər əldə olunsun. Bu baxımdan da mən İnam Kərimovun bu addımını çox müsbət qiymətləndirirəm”.

Deputat qeyd edib ki, nazir əhali ilə şəxsən görüşəndə, daha çox məlumatlı olur:

“Belə olanda, nazir yerlərdəki vəziyyətlə daha dəqiq tanış ola bilir. Nazirin ətrafında olan şəxslərin heç də hamısı məlumatları düzgün təqdim etmir. Nazir şəxsən gedib özü əhali ilə görüşəndə mövcud reallıqları öz gözləri ilə görür və ona uyğun addımlar atır. Rəhmətlik Heydər Əliyev SSRİ dövründə Birinci katib işləyən vaxtı gününün əsas hissəsini kənd əhalisinin, sıravi insanların arasında keçirirdi. Məqsədi də o idi ki, mövcud vəziyyətlə düzgün tanış ola və dəqiq qərarlar qəbul edə bilsin. Ümumiyyətlə, nazirin əhali ilə görüşməsi çox təqdirəlayiq haldır. Yəni, nazirin kənd əhalisi ilə görüşməsi və onların vəziyyətilə yerindəcə tanış olması çox müsbət haldır. Cənab prezident istəyir ki, onun kimi, vəzifə verdiyi məmurları da əhali ilə görüşüb, onları dinləsin, lazımı tədbirlər görsün. Bu gün cənab prezident rayon və kəndlərimizdə səfərlərdə olur, əhali ilə tez-tez görüşür, müxtəliflər açılışlar edir. Təbii ki, bu nazirlərimiz üçün də nümunə olmalıdır. Bu baxımdan İnam Kərimovun kənd təsərrüfatı kimi fermerlərlə görüşlər keçirməsini çox müsbət qiymətləndirirəm”.

Vasif Həsənli
Ölkə.Az