Bakı İslam Universiteti beynəlxalq konfransın təşkilatçısı olacaq

Bakı İslam Universiteti uğura imza atıb.

Universitetdən Ölkə.Az-a daxil olan məlumata görə, Bakı İslam Universiteti yeni ildən Ukrayna Təhsil və elm nazirliyi tərəfindən əhəmiyyətli elmi tədbirlər sırasına daxil edilən V.Dalya adına Şərqi Ukrayna Milli Universitetinin təşəbbüsü ilə ildə iki dəfə təşkil olunan beynəlxalq elmi konfransların təşkilatçısı və həmtəsisçisi qismində çıxış edəcək.

Nazirliyin qərarına və əməkdaşlıq müqavilələrinə əsasən, beynəlxalq elmi konfransın təşkilatçıları Ukrayna, Rusiya, Polşa, Serbiya və Azərbaycandan olan ali təhsil müəssisələridir. Konfransların elmi istiqamətlərinə din, dinşünaslıq, mədəniyyətşünaslıq, fəlsəfə, sosiologiya, politologiya, dövlət idarəçiliyi daxildir. Konfranslarda əldə olunan elmi nəticələrin isə həm MDB, həm də bir sıra Avropa dövlətlərində mövcud olan elmi kitabxanalara göndərilməsi nəzərdə tutulub.

Beş dövlət arasında təhsil və elm sahəsində Azərbaycanı bu layihədə təmsil edən Bakı İslam Universitetinin rektoru Hacı Sabir Həsənli redaksiya heyətinin üzvü və dinşünaslıq istiqaməti üzrə ekspert seçilib. Bu konfransların Azərbaycan üzrə koordinatoru isə xaricdə təşkil olunan bir neçə beynəlxalq elmi müsabiqələrin qalibi və laureatı, 50-dən çox elmi məqalənin və Almaniyada nəşr edilmiş monoqrafiyanın müəllifi, universitetin "İctimai fənlər" kafedrasının müdiri Hacı Elvin Talışınski təyin olunub.

Ukrayna nümayəndələrindən verilən məlumata görə, gələcəkdə bu layihəyə Çexiya və Bolqarıstan ali təhsil müəssisələri də qoşulmaq niyyətindədir.

Rəşid Mustafazadə

Ölkə.Az