Təranə Qumralın yeni cinayət işi
“Ölkə.Az”ın xəbərinə görə, cinayət məcəlləsinin 306.1-ci (məhkəmə qərarlarını icra etməmə) maddəsi ilə təqsirləndirilən İbrahimova Təranə Xeyrulla qızının məhkəmə prosesinin hazırlıq iclası may ayının 29-da hakim Rəşad Abdulovun sədrliyi ilə keçiriləcək. Cinayət işində 3 nəfər- Həsənov Məhəbbət Əmirxan oğlu, Salayeva Nazənin Rəhim qızı və Abbasov Pərviz Sakit oğlu zərərçəkən qismində tanınıb.
Xatırladaq ki, “Bakı Apelyasiya Məhkəməsinin 2 qətnaməsi mövcud olub. Hər iki qətnamədə qeyd olunub ki, İbrahimova Təranə Xeyrulla qızı Salayeva Nazəninə 500 manat pul ödəməlidir. Bundan başqa Nazənin xanımdan üzr istəməli, barəsində dediklərinə təkzib verməlidir. Digər qətnamədə də göstərilir ki, cavabdeh şəxs, İbrahimova Təranə Nazənin xanımın həyat yoldaşı Məhəbbət bəyə 3 min manat təzminat ödəməli və onun barəsində dediyi fikirləri də təkzib etməlidir. İcra şöbəsində bu məhkəmə qətnaməsi icradadır. Ədliyyə Nazirliyinin rəhbərliyinə rəsmi müraciət olunub. Məhkəmə qətnaməsindən İbrahimova Təranə yayınırdı. Ədliyyə Nazirliyi tərəfindən bu məsələ nəzarətə götürüldü. Qısa müddət ərzində 3500 manat pul Nazənin xanım və onun həyat yoldaşı Məhəbbət bəyə ödənilməsi təmin edildi. Əlavə olaraq, Təranə İbrahimova barəsində qanuna müvafiq ölçü götürüldü. O, açıq-aşkar icra şöbəsində izahat yazaraq məhkəmə qətnamələrini icraatından yayındığını bildirib. Yəni icra etməyəcəyini deyib. O, əvvəl icra məmurunun qanun tələbini yerinə yetirmədiyi üçün İnzibatı Xətalar Məcəlləsinin 528-ci maddəsinə əsasən 1000 manat cərimə edilib. Cərimə olunandan sonra icra məmuru tərəfindən rəsmi xəbərdarlıq edilməsinə baxmayaraq, Təranə İbrahimova bu istiqamətdə heç bir addım atmayıb. Artıq bir neçə gün öncə icra şöbəsindən Təranə İbrahimovaya rəsmi qaydada müraciət olunub. Qısa müddətdə məhkəmə qətnaməsi üzrə tələbləri tam təmin etmədiyi halda o, Cinayət Məcəlləsinin 306-cı maddəsi ilə məsuliyyətə cəlb olunacaq. Bu maddədə göstərilir ki, həmin şəxs 3 il müddətində azadlıqdan məhrum edilə bilər ”.
Həmçinin məhkəmə qərarına əsasən Təranə Qumral ölkədən getmək hüququnun müvəqqəti olaraq məhdudlaşdırılması barədə Nərimanov Rayon Məhkəməsində qərardad qəbul edilib.
Qeyd edək ki, T.Qumralla Nazənin arasında qalmaqal “ANS”-in “Bazar səhəri” verilişində başlayıb. Belə ki, Nazənin canlı efirə zəng edərək, Təranə Qumrala “Səni ərimlə tutdum” demişdi. T.Qumral isə öz növbəsində Nazənin barəsində bir xoş olmayan ifadələr işlətmişdi. Buna görə də Nazənin məhkəməyə müraciət etmişdi. Nazənin məhkəmədə həyat yoldaşının müğənni Təranə Qumralla intim münasibəti olduğunu sübut etmişdi.
