Rusiya Kanadanın sanksiyalarına cavab verəcək

"Rusiyaya qarşı Kanadanın növbəti sanksiyalar paketi öyrəniləcək və bu hərəkətlər cavabsız qalmayacaq"

Ölkə.Az xəbər verir ki, bu barədə Rusiya xarici işlər nazirinin müavini Sergey Ryabkov İTAR-TASS-a müsahibəsində danışıb.

"Kanada hökümətinin Rusiyaya qarşı bu cür nümayişkəranə təzyiq etməsi bizi təəccübləndirir. Bu təzyiqlərin qeyri-müstəqil olması və əlaqələrimizin möhkəmləndirilməsinə yönəlməməsi şübhəsizdir"- deyə Ryabkov vurğulayıb.

Xatırladaq ki, Kanada Rusiyaya qarşı yeni sanksiyalar tətbiq edib. Sanksiya siyahısına M.İ.Kalinin adına maşınqayırma zavodu, Dolqoprudnensk elmi-istehsalat müəssisəsi, Mıtişinsk maşınqayırma zavodu, V.V.Tixomirov adına elmi-istehsalat müəssisəsi və “Altair” radioelektronika elmi-təhqiqat institutu əlavə edilib.

Eyni zamanda Rusiyanın “Sberbank” bankı da sanksiya siyahısına daxil edilib.

Sanksiyalar həmçinin bir neçə vəzifəli şəxsləri - müdafiə nazirinin müavinləri Dmitri Bulqakov və Yuri Sadovenko, Baş Qərargah rəisinin birinci müavini Nikolay Boqdanovski və Quru Qoşunların komandanı Nikolay Salyukov da əhatə edib.

Rəşid Mustafazadə

Ölkə.Az