Zahid Oruc: "Millət vəkillərinin də bütün hallarda insan olduğunu qəbul etmək lazımdır"

Milli Məclisin bir qrup deputatına KAT LTD-nin Xətai rayonunda yerləşən "Amay” Ticarət Mərkəzi yaxınlığında inşa etdiyi binada mənzillər veriləcək xəbəri sosial şəbəkə istifadəçiləri tərəfindən maraqla qarşılanıb.

İstifadəçilər məsələyə bir-birindən maraqlı şərhlər verməyə başlayıblar. Kimiləri millət vəkillərini acgözlükdə, kimiləri isə ironik şərhlərlə yadda qalıb.

Millət vəkili Zahid Oruc mövzu ilə bağlı Ölkə.az-a danışıb. O, bu mövzuda şərh verən insanlara səslənərək millət vəkillərinin də bütün hallarda insan olduğunu unutmamağa çağırıb.

"Məsələ parlament üzvlərinə konkret hansısa bir binada pulsuz ev verilməsindən getmir. Söhbət 10 il bundan əvvəl millət vəkillərinin özləri tərəfindən vəsait ödənilərək tikilən binanın sonradan müəyyən səbəbdən tikintisinin dayandırılması və bu işin illərlə həll olunmamış vəziyyətdə qalmağından gedir. Bir sıra parlament üzvləri öz vəsaitlərini geri alıb, alternativ təkliflərə razılaşsalar da, bir hissəsi isə həmin tikinti şirkəti ilə münasibətlərinə davam edərək onların hazırkı dövrdə başqa bir məkandan-inşa etdikləri binadan öz mənzillərini almaq hüququndan söhbət gedir. Əgər bu ictimai diskussiyanın predmetinə çevrilibsə, ilk növbədə arzu edirəm ki, tənqidçilər məsələnin mahiyyətini aydınlaşdırsınlar. Burada sıravi vətəndaşların, hər hansı alıcıların hüquqları necədirsə, eyni nöqteyi-nəzərdə də parlament üzvlərini saymaq lazımdır.

Ona görə də, millət vəkillərinin də bütün hallarda insan olduğunu onun da başqa adamlar kimi ehtiyyaclara malik olduğunu qəbul etmək lazımdır".

Qeyd edək ki, yayılan xəbərlərdə "mənzil alacaq deputatlar buna ehtiyacı olanlardır" cümləsinin işlənməsi oxucularda qıcıq yaratmışdır.

Fatimə İbrahimova
Ölkə.Az