Politoloq: "Türkiyə heç vaxt İŞİD-ə qarşı geniş müharibə aparmayacaq"

Türkiyə Böyük Millətlər Məclisi Türkiyə Silahlı Qüvvələrinə xarici ölkələrdə hərbi əməliyyatları aparmasını nəzərdə tutan qanun layihəsini qəbul etdiyi barədə xəbər vermişdik.

Qanun layihəsində zəruri hallarda Türkiyə Silahlı Qüvvələrinə xarici ölkələrdə hərbi əməliyyatlar aparılması icazəsi verilir.

Məsələ ilə bağlı Ölkə.az-a danışan politoloq Vəfa Quluzadə bildirdi ki, Türkiyədə baş verən son hadisələrdən sonra bu cür qanunun qüvvəyə minməsi normaldır. 

Türkiyə və İŞİD arasında ehtimal olunan müharibə haqqında isə politoloq belə deyib:

"Türkiyə heç vaxt İŞİD-ə qarşı geniş müharibə aparmayacaq, lakin özünün sərhədlərini qorumaq məqsədilə qüvvələri məhv etməklə məşğul olacaq. Bu dəqiqə İŞİD-in əlehinə dünyanın lideri olan Amerika mübarizə aparır. Türkiyə “İŞİD”-ə qarşı beynəlxalq koalisiyanın üzvüdür. Türkiyə NATO-nun üzvü ola-ola bu koalisiyadan kənar qala bilməzdi. Üstəlik, Suriyada və İraqdakı qeyri-sabitlikdən əziyyət çəkən ən çox Türkiyədir. Çünki qaçqınlar Türkiyə ərazisində toplaşıblar. Yüz minlərlə suruyalılar Türkiyədə məskən salıb. İndi təhdid var ki, İŞİD döyüşçüləri Türkiyə ərazisinə keçə bilərlər.Ona görə də Türkiyə bu qanunu qəbul edib. Türkiyə heç vaxt İŞİD-ə qarşı geniş müharibə aparmayacaq, lakin özünün sərhədlərini qorumaq məqsədilə qüvvələri məhv etməklə məşğul olacaq”.  

Qeyd edək ki, İŞİD döyüşçüləri Türkiyənin Suriya ilə sərhəddi boyu bütün yaşayış məntəqələrini ələ keçirməkdə davam edir və kürdlərlə islamçılar arasında gedən döyüşlər zamanı dəfələrlə bu ölkənin ərazisinə mərmilər və raketlər düşmüşdü. Təhlükəsizliyi nəzərə alaraq Türkiyə Parlamenti orduya baş verə biləcək təxribatların qarşısını almaq üçün əlavə səlahiyyətlər vermiş oldu.

Fatimə İbrahimli

Ölkə.az