Ekspert: "Yanacağın qiymətləri ən çox avtomobil bazarına təsir edəcək"

Dünəndən etibarən benzinin qiymətində 2 qəpik artım müşahidə olundu. Hər kəsə bəllidir ki, benzinin qiymətində baş verən artım xüsusən maşın bazarında təsirsiz ötüşmür. Bəs görəsən, benzinin artması avtomobil şirkətlərinin marketinqinə nə kimi təsir edəcək? şirkətlər reklam xərclərini azaldacaq, yoxsa riskləri gözə alaraq aqressiv marketinq taktikaları edəcəklər?

Bu məsələ ilə bağlı Ölkə.az-ın suallarını marketinq üzrə ekspert Ramil Cabbarov cavablandırıb.

"Sözü gedən qiymət siyasətinin əsasında duran məsələləri müzakirə etmək üçün bir qədər gözləməkdə yarar var. Amma bu qərardan sonra milli marketinq bazarında ciddi dəyişikliyin olacağı gözləniləndir. Başda avtomobil sektoru olmaqla, fəaliyyətində nəqliyyat adı keçən hər bir biznes növü strateji planında dəyişiklik etmək məcburiyyətindədir.
Təbii ki, qərardan ən çox təsirlənən avtomobil bazarı olacaq. Xərclərini səmərəli idarə etmək üçün istehlakçılar birmənalı olaraq bu dövrdə avtomobil üzrə alıcılıq qabiliyyətlərini dəyişəcəklər. Ən yaxşı halda avtomobil sahiblənmək arzularını qeyri-müəyyən müddətə qədər təxirə salacaqlar. Nəticə etibarilə müştərisindən bir qədər də uzaqlaşan avtomobil nümayəndəlikləri çətin vəziyyətdə qalacaq.

Bu situasiyada, daha dəqiq böhran ərəfəsində marketinq gedişlərinin uğuru vacib faktordur. Şirkətlər müştərilərinə psixoloji inandırmaqla alıcılıq qabiliyyətlərini artırmalı, ya da marketinq xərclərini vəziyyət sabitləşənə qədər azaltmalıdır. Təcrübə onun göstərir ki, dünyada bu cür vəziyyətlərdə şirkətlər daha çox riskə getməyə üstünlük verirlər. Aqressiv mövqe nümayiş etdirməklə, böhrandan yaranmış bazar boşluqlarını ələ keçirərək pay sahibliklərini artırırlar. İndiki halda bazarda boşalan mövqe təbii ki, az sərfiyyatlı avtomobil markalarıdır. Marketinq gedişlərində mövqe dəyişikliyi etməyin ən optimal vaxtıdır, desək yanılmarıq".

- Vəziyyətdən necə yararlanmaq olar?

"Marketinq xərclərini düzgün və sərfəli idarəedilməsini həyata keçirmək üçün sosial mediada təmsil olunma gücləndirilməlidir. Hər bir müştərinin arzusunda olduğu hiss edilən endirimlərin də tətbiqi satışların azalan tempini yavaşlada bilər. Onsuz da çətin vəziyyətdə qalan sürücülər üçün satış sonrası servis qiymətlərinin əlçatan edilməsində də fayda vardır".

Xatırladaq ki, dünəndən etibarən Azərbaycan Respublikası Tarif Şurasının qərarına əsasən, yol vergisi əlavə olunmaqla Aİ-92 markalı avtomobil benzininin pərakəndə satış qiyməti 2 qəpik artırılaraq 1 litr üçün 72 qəpik, dizel yanacağının pərakəndə satış qiyməti isə 1 litr üçün 62 qəpik olub.

Fatimə İbrahimova
Ölkə.az