İrandan heroin daşıyan 33 yaşlı qadının cinayət işi

“Ölkə.Az”ın xəbərinə görə, narkotik vasitələrin qanunsuz saxlanılması maddəsi ilə məhkum olunan Bakı şəhər sakini Ələkbərli Fərqanə Ağakişi qızının məhkəmə prosesi iyun ayının 25-də hakim Fərhad Kərimovun sədrliyi ilə keçiriləcək. 

Belə ki, Ələkbərli Fərqanə Ağakişi qızı 2017-ci ilin aprel ayının əvvəllərində özünə məxsus  “Opel Vectra” markalı, 90 HN 673 dövlət nömrə nişanlı avtomobili ilə İran İslam Respublikasının Ərdəbil şəhərinə səfərə gedib. Orada isə istintaqla müəyyən edilməmiş şəxslərlə əlbir olub və 2 ədəd bağlamada külli miqdarda 1695 qram heroin narkotik vasitəsini satış məqsədi ilə əldə edib. Həmin narkotik vasitəni isə “Opel Vectra” markalı avtomobilin mühərrikinin aşağı sağ hissəsində, zavod konstruksiyasında nəzərdə tutulmamış, sonradan mühərrikə bərkidilmiş staterin içərisində yerləşdirib və 10 aprel 2017-ci il tarixdə, saat 18 radələrində Astara Gömrük İdarəsinin sərnişin-nəqliyyat şöbəsində Azərbaycan Respublikasının gömrük sərhədindən gömrük nəzarətindən kənar keçirib. 

İlkin istintaq zamanı F. Ələkbərli ifadə verərək bildirib ki, bacısının faktiki həyat yoldaşı İlham (Həsən Həsənov) tərəfindən aldadılıb. Belə ki, Fərqanə xəstə olduğu üçün bacısının əri İlham ilə  İran İslam Respublikasının Ərdəbil şəhərinə dərman almaq məqsədi ilə gedib. Orada isə İlham narkotik vasitələri ondan gizlin şəkildə avtomaşına yerləşdirib.  

Lənkəran Ağır Cinayətlər Məhkəməsinin 22 noyabr 2017-ci il tarixli hökmü ilə Fərqanə Ələkbərli cinayət məcəlləsinin 206.3.2, 234.4.1 və 234.4.3-cü maddələri ilə təqsirli bilinərək 9 il 6 ay müddətinə azadlıqdan məhrum edilib. 1 mart 2018-ci il tarixdə isə Şirvan Apellyasiya Məhkəməsi 1-ci instansiya məhkəməsinin hökmünü qismən dəyişərək cəzanı 7 il 6 aya endirib. 

Məlum olub ki, subay olan 1985-ci il təvəllüdlü Fərqanə Ələkbərlinin himayəsində üç azyaşlı körpə uşağı var.