Politoloq: "Yaxşı pul verməklə istənilən rus jurnalisti almaq olar"

Rusiyanın “5-ci kanal” adlanan televiziya kanalında yayımlanan, obyektivlikdən və vicdandan kənar olan və yalnız Ermənistan tərəfinin yalanlarına xidmət edən verilişdə Azərbaycan Respublikasının işğal olunmuş ərazilərində və Ermənistan ərazisində Azərbaycan xalqına qarşı törədilmiş qanlı etnik təmizləmə, bir milyondan artıq azərbaycanlının qaçqın və məcburi köçkün vəziyyətinə düşməsi faktlarına məqsədyönlü şəkildə yer verilməməsinə politoloq Zərdüşt Əlizadə münasibət bildirib.

Ölkə.az-a danışan politoloqun fikrincə, rus jurnalistlər hamısı satılıqdır.

"Rusiyada müxtəlif kanallar var. Onların hər biri də müxtəlif istiqamətdə verilişlər hazırlayırlar. Vaxt var idi rus jurnalistlər gəlib burada yeyib-içib Heydər Əliyev haqqında müsbət çıxışlar hazırlayırdılar. İndi isə rus jurnalistlər bizim əleyhimizə yazılarla mətbuatda çıxış edirlər. Ümumilikdə rus jurnalistləri muzdludurlar. Onları satın almaq çox asandır. Yaxşı pul verdikdə istənilən rus jurnalisti almaq olar, sadəcə bir az pul xərcləmək lazımdır".

Qeyd edək ki, məsələyə artıq Azərbaycan Xarici İşlər Nazirliyinin sözçüsündən münasibət gəlib.

Fatimə İbrahimova
Ölkə.az