Yəhudilər silah gəzdirmək üçün icazə istəyir

Avropa yəhudiləri silah gəzdirmək üçün icazə istəyir.

Ölkə.Az xəbər verir ki, Avropa İttifaqının ən böyük yəhudi federasiyası avropalı qanunvericiləri özünümüdafiə məqsədilə yəhudilərə silah gəzdirmək üçün icazə verməyə çağırıb. Federasiyanın Avropa İttifaqı ölkələrinin daxili işlər nazirlərinə göndərdiyi məktub "The Washington Free Beacon"da yerləşdirilib. Sözügedən sənəd Avropa yəhudi assosiasiyasının başçısı ravvin Menahem Marqolin tərəfindən imzalanıb.

Marqolinin sözlərinə görə, Avropada antisemitizm, rasizm və qeyri-tolerantlıq dalğası müşahidə olunmaqdadır və bir çox yəhudilər hücumlardan qorxduğu üçün sinaqoqları ziyarət etmirlər.

Xatırladaq ki, yanvarın 9-u "Charlie Hebdo"ya hücumdan iki gün sonra Parisdə koşer məhsullar mağazasında Amedi Kulibali adlı şəxs 20 nəfəri girov götürmüş, onlardan 4-nü qətlə yetirmişdi. Öldürülənlərin hamısı yəhudi idi.

Rəşid Mustafazadə

Ölkə.Az