Sarkisyan Ərdoğanın dəvətinə belə cavab verdi

Sarkisyanın cavabı çox gözlətmədi.

Ölkə.Az "Armenia Today" agentliyinə istinadən xəbər verir ki, Ermənistan prezidenti Türkiyəli həmkarı Rəcəb Tayyıb Ərdoğanın Çanaqqala vuruşmasının 100 illiyinə həsr olunmuş tədbirlərə dəvətinə cavab verib.

O, cavab məktubunda Birinci müharibəsinin bəşəriyyət tarixində ən iyrənc səhifələrdən biri adlandırıb və Çanaqqala vuruşmasında iştirak edən erməni hərbçilərdən söz açıb.

Sarkisyan Türkiyəni tarixi təhrif etmək ənənəsini davam etdirməkdə günahlandırıb:

"Təəssüf ki, Türkiyə ənənəvi təkzib etmə siyasətini davam etdirir və ildən-ilə tarixin təhrifi arsenalını mükəmməlləşdirir. Bu il 24 apreldə ilk dəfə Çanaqqala vuruşmasının 100 illiyi qeyd olunur, baxmayaraq ki, döyüşlər 1915-ci ilin 18 mart tarixində başlamış və 1916-cı ilin yanvarın sonuna qədər davam etmişdi", - deyə Sarkisyan bildirib.

Sarkisyan Ərdoğana dünyaya etdiyi çağırışlarında erməni soyqırımını tanınması üçün də mesaj verməyi unutmamağı tövsiyə edib.

Məktubun maraqlı hissələrindən biri də "P.S"-dir:

"P.S. Zati-aliləri,
Hələ bir neçə ay əvvəl mən sizi bizimlə birlikdə erməni soyqırımının günahsız qurbanlarının xatirəsini yad etmək üçün 24 aprel 2015-ci il üçün İrəvana dəvət etmişdim. Bizim adətlərdə, öz dəvətimizə cavab verməyənlərə qonaq getmək yoxdur", - deyə məktubda qeyd olunub.

Xatırladaq ki, Türkiyə prezidentinin Sarkisyanı Çanaqqala vuruşmasının yubiley şənliklərinə dəvət etməsi bir çoxları tərəfindən Ermənistan liderinin ələ salınması kimi qəbul edilərək mediada rezonans doğurmuşdu.

Rəşid Mustafazadə

Ölkə.Az