Mətn ölçüsü:
  • 100%

Azərbaycanda şokolad bahalaşacaq

“Frank bahalaşır”.

İsveçrədə əgər qiymət qalxıbsa, Azərbaycana bu ölkədən idxal olunan məhsulların da qiymətinin qalxması müşahidə olunacaq.

Bu barədə iqtisadçı-ekspert Oqtay Haqverdiyev bildirib.

Ekspertin sözlərinə görə, həmin məhsulları Azərbaycanın özü istehsal etsəydi, o zaman qiymətləri tənzimləyə bilərdi:

“Bunu biz istehsal etmirik ki, qiymətləri özümüz tənzimləyək. Neçəyə alırıqsa, onun üstünə qoyub satırıq”.

Ekspert Samir Əliyev isə bildirir ki, İsveçrənin Mərkəzi Bankının frankın bahalaşmasını saxlamaq barədə qərarı ilə bu ölkənin milli valyutasının avroya olan məzənnəsini 30% bahalaşdırdı:

“Bahalaşma dollara nisbətən də baş verdi. Elə buna görə Azərbaycanın İsveçrə ilə xarici ticarət mübadiləsinə nəzər yetirməli oldum. Çox maraqlı tendensiya üzə çıxdı. Məlum oldu ki, ötən il bu ölkə ilə ticarət əməliyyatlarının həcmi təxminən 250 milyon dollar olub. Bu, 2013-cü illə müqayisədə 16 milyon dollar çoxdur. Maraqlı tendensiya heç də təkcə ticarət dövriyyəsinin artmasında deyil. Maraqlısı odur ki, ötən il Azərbaycanın İsveçrəyə ixracı təxminən 2 dəfə artıb. Yəni 74,4 milyon dollardan 154,9 milyon dollara yüksəlib. İdxal isə əksinə, 1,7 dəfə azalaraq 159,6 milyon dollardan 94,4 milyon dollara düşüb”.

Ekspert bildirir ki, frankın bahalaşması çox güman ki, İsveçrədən gətirilən məhsulların (məsələn, saat, şokolad və s.) qiymətinə təsirsiz ötüşməyəcək:

“Bütün bunlar isə ötən il manatın franka nisbətən 8,6% bahalaşması fonunda baş verib. Halbuki məntiqlə tərsinə olmalı idi. İndi frank xeyli bahalaşıb. Deməli, 2015-ci ildə də Azərbaycanın bu ölkəyə ixracının artmaqda davam etməsi imkanı yaranıb. İsveçrədən gətirilən məhsullar isə (məsələn, saat, şokolad və s.) güman ki, bahalaşacaq”.

Öz növbəsində İsveçrə saatı Swatch-un Azərbaycandakı nümayəndəliyi bildirdi ki, saatların qiymətində bahalaşma müşahidə olunmayıb:

“Qiymətlər yaxın günlərdə də stabil olaraq qalacaq”.(oxu.az)

Ölkə.Az