Mətn ölçüsü:
  • 100%

Təhsil müəssisələrinin internet problemi

"Təhsil müəssisələrinin əksəriyyəti geniş zolaqlı internetə hələ də qoşulmayıb"

"Hazırda ölkə əhalisinin 73%-i internet, 55%-i isə genişzolaqlı xidmət istifadəçidir. Hər iki göstərici üzrə Azərbaycan dünya orta göstəricisini təqribən 2 dəfə qabaqlayır”-bu sözləri bir neçə gün bundan öncə Rabitə və Yüksək Texnologiyalar Nazirliyində keçirilən kollegiya iclası zamanı nazir Əli Abbasov deyib. Nazir 2014-cü il ərzində Azərbaycanda 100 nəfərə düşən sabit telefon abunəçilərinin sayına görə ümumdünya orta göstəricisini 18%, mobil abunəçilərin sayına görə isə 15,2% üstələdiyini bildirib.

Mövzu barədə Ölkə.az-a danışan "Multimedia" İnformasiya Sistemləri Texnologiyaları Mərkəzinin direktoru, Azərbaycan İnternet Forumunun prezidenti Osman Gündüzün fikrincə isə bizdə aktiv internet istifadəçilərinin sayı statistik rəqəmdən xeyli aşağıdır.

"Azərbaycanda internet istifadəçilərinin əsas katoqoriyası gənclərdir. Onların böyük əksəriyyətini yaşı 35-ə qədər olan kütlə təşkil edir. Əsas internet istifadəçilərinin böyük əksəriyyəti sosial mediadan daha aktiv istifadə edənlərdir. Burada həm adi qaydada, yəni geniş zolaqsız internetə qoşunlanlar da nəzərdə tutulur, həmçinin telefonundan hansısa bir anda internetə giriş edən insanlar da nəzərdə tutulur.

Keyfiyyətli internet istifadəçilərinin statistikasına baxsaq görərik ki, bu az say təşkil edir. Baxmayaraq ki, 75% insan internetdən istifadə edir, amma onların sosial media istifadəçiləri deyək ki, milyon yarımdır. Məntiqlə internet istifadəçilərinin böyük əksəriyyəti sosial mediadadır. Amma internet istifadəçiləri və sosial media istifadəçiləri arasında kəskin fərq var. Bundan belə qənaətə gəlirik ki, bizdə aktiv internet istifadəçilərinin sayı statistik rəqəmdən xeyli aşağıdır. Bu da onun göstəricisidir ki, hələlik internetdən müxtəlif sahələrdə səmərəli istifadə olunmur. Misal çəkə bilərəm ki, təhsil müəssisələrinin əksəriyyəti geniş zolaqlı internetə hələ də qoşulmayıblar. Ölkədə mövcud olan 4500 təhsil müəssisəsi varsa, onların yalnız 50% keyfiyyətli internetə qoşulub. Məsələn regionun mərkəzində hansısa bir geniş zolaqlı internetə əlçatımlılıq var, amma kəndlər üçün bunu danışmaq çox tezdir. Statistikaya görə də, 50%-ə qədər əhali kənd əhalisidir. Kənd əhalisinin də hələlik keyfiyyətli internetdən istifadəsində problemlər var.

Biz dövlət hesabına ölkədə milli geniş zolaqlı internetin inkişafı layihəsinin başlanmasını gözləyirdik. Təəssüf olsun ki, bu il məlum oldu ki, bu layihə dövlət büdcəsi tərəfindən maliyələşməyəcək. Ümid qaldı Rabitə Nazirliyinin, AzTelekom-un daxili hesablarına. Mən düşünürəm ki, böyük bir layihənin dayanması bütün inkişaf tempinə ciddi mane ola bilər".

Qeyd edək ki, 2013-cü illə müqayisədə beynəlxalq internet kanallarının tutumu 50 Gbit/s artırılaraq 300 Gb/s-ə çatdırılıb


Fatimə İbrahimova
Ölkə.az