"Park Cinema"nın 20 Yanvar şəhidlərinə hörmətsizliyi sübut olundu

Fotoda olan biletdə məhz komediya janrında olan filmin 19:20-də yayımlandığı göstərilib.

Ölkə.Az xəbər verir ki, dünən və bu gün müxtəlif yerli media orqanlarında "Park Cinema"nın 20 Yanvar günü şəhidlərin ruhuna hörmətsizlik etməsi barədə xəbərlər yayılmışdı.

Bildirilirdi ki, Azərbaycanda ümummilli hüzn günü qeyd olunarkən Park Cinema tamaşaçılara komediya təqdim edib. "Park Cinema"nın bu hərəkəti vətəndaşlar və ictimai xadimlər tərəfindən tənqid olunmuşdu.

Bir müddət sonra "Park Cinema" rəhbərliyi mətbuatda səsləndirilən fikirləri təkzib edib və 20 Yanvar günü heç bir kinokomediya nümayiş etdirmədiklərini bəyan edib.

Sözügedən kinoteatrlar şəbəkəsinin direktoru Namiq Quliyev mətbuata verdiyi açıqlamasında bildirib ki, 20 yanvar günü kinoteatrda ümumiyyətlə komediya janrında film nümayiş olunmayıb:

"Şəhidlərimizə, dövlətimizin müstəqilliyi ugrunda canından keçən insanlara hörmətsizlik haqda yayılan xəbərlər bizi təəssüfləndirir. 20 Yanvar günü bütün ümumxalq matəm günlərində oldugu kimi, repertuarımıza komediya janrında film salmırıq. Hətta bu dəfə həmin gün kinoteatrlarımızın ziyarətçilərinə rejissor Vahid Mustafayevin çəkdiyi "Qanlı Yanvar" filmi də təqdim olundu. "Park Cinema Kinoteatrlar" şəbəkəsinin bütün zallarında (Park Cinema Park Bulvar, Metropark, "Flame Towers", Zaqulba) eyni cədvəl üzrə filmlər nümayiş olunub", - deyə direktor bildirib.

Lakin bu gün Ölkə.Az-ın əldə etdiyi fotoşəkil "Park Cinema" rəhbərliyinin söylədiyi fikirlərin doğru olduğunu şübhə altına salıb. Belə ki, həmin şəkildə 20 yanvar tarixinə təyin olunmuş seansın bileti təsvir olunub. Maraqlısı odur ki, kinoteatr şəbəkəsinin direktorunun Qanlı Yanvar günündə repertuara komediya janrında filmlərin salınmaması deməsinə baxmayaraq, sözügedən fotoda məhz komediya janrında olan "Bax belə, rəfiqə" adlı İtaliya istehsalı olan filmin 19:20-də yayımlandığı göstərilib.

Həmin şəkli sizlərə təqdim edirik: