Fuad Qəhrəmanlıdan İqbal Ağazadəyə cavab: "Bu cür insanlara vaxt sərf etməyə ehtiyac duymuruq"

Bir neçə gün bundan öncə millət vəkili İqbal Ağazadənin "Müsavat" qəzetinə verdiyi müsahibəsidə “Biz AXCP ilə eyni dildə danışa bilmirik...” deməsinə AXCP sədr müavini Fuad Qəhrəmanlıdan cavab gəlib.

Ölkə.az-a danışan Fuad Qəhrəmanlı bildirib ki, onlar mübarizədən başqa hər hansı insanlara diqqət ayırmağa lüzum görmürlər.

"AXCP illərdir azadlıq uğrunda mübarizə aparır. Bu mübarizədən başqa hər hansı insanlara diqqət ayırmağa lüzum görmürük. Ona görə bu cür məsələrə, insanlara diqqət ayırmaq və vaxt sərf etməyə ehtiyyac görmürük. Xalq Cəbhəsinin hazırda gündəmində mübarizə yönümlü məsələlərdir. Ona görə də, biz bu mövzulara qəti vaxt ayırmağı düşünmürük".

Xatırladırıq ki, "Müsavat" qəzetinə müsahibə verən millət vəkili İqbal Ağazadə ona ünvanlanan suala bu cür cavab vermişdi.

Müsahibədən bir hissə...

- Müxalifətin fevraldan etibarən yaradacağı blok variantları arasında sizə ən doğması hansıdır? Siz kimlərlə blokda olmaq istərdiniz?

- Mən açıq deyirəm, danışıqlar da gedir, biz Azərbaycan Demokrat Partiyası, Müsavat Partiyası, Klassik Xalq Cəbhəsi Partiyası, Xalq Partiyası, ReAL, “125-lər” Siyasi Klubu ilə bir yerdə olmaq istəyirik.

- AXCP-siz blok qurmaq istəyirsiniz...

- Bəli.

- Niyə?

- Ritorikalar çox fərqlidir. Biz eyni dildə danışmayacağıq.

- Siyasətləriniz fərqlidirmi?

- Siyasətlərimiz də fərqlidir. Biz eyni dildə danışa bilmirik. Bizim seçiciyə mesajımız dağıdıcı olacaq. 2 seçici gətirsək ki, gəlin bizim nə istədiyimizi dinləyin, o bir Əli Kərimliyə, bir də mənə qulaq assa, açıq-aşkar görəcək ki, biz başqa şeylər danışırıq və çıxıb gedəcək.

- Siz onlar kimi danışa bilməzsiniz?

- Yox, mən danışa bilmərəm.

- Bəs, onlar sizin kimi danışmağa başlasa, birləşmək mümkün olarmı?

- Onlar mənim kimi danışmağa başlasa, cəmiyyət qazanacaq. Mən onlar kimi danışmağa başlasam, yenə ortada heç nə olmayacaq, demokratik proses bundan heç nə qazanmayacaq. Çünki uzun illərdir çox adamlar belə danışır.