Azərbaycan saytlarına hücumlar hardandır

Xəbər verildiyi kimi artıq iki gündür Azərbaycanın bir çox tanınmış xəbər portallarının serverləri güclü virus hücumları nəticəsində çöküb.

Məsələni dəqiqləşdirmək üçün qısa bir şəbəkə araşdırması apardıq. Araşdırmalarımız nəticəsində məlum oldu ki, Azərbaycan internet xəbər resursları dünyada ən çox virus hücumuna mərus qalan saytlar arasındadır və Azərbaycan saytlarının virusdan müdafiəsində də çox böyük boşluqlar və ciddi problemlər var. Ona görə də kütləvi DDoS-hücumları zamanı əksər Azərbaycan saytlarının yerləşdiyi serverlər çökür, sutkalarla bu saytlara girmək mümkün olmur.

Həm siyasət və döyüş meydanında, həm də kiberməkanda Azərbaycanın ən başlıca düşməni şübhəsiz ki, ermənilərdir. Əksər vaxtlar Azərbaycanın dövlət orqanlarının rəsmi saytları və ya xəbər portallarına DDoS-hücumlar erməni hakerlər tərəfindən təşkil edilirdi. Əsasən də Ermənistanın siyasətini ifşa edən rus və ingilisdilli saytlara virus hücumları təşkil edilirdi. 2015-ci ilin əvvəlindən, yəni son bir ay ərzində Azərbaycanın xəbər portallarına olan DDoS-hücumlar səngimək bilmir. Son iki gün ərzində isə Azərbaycan internet-mediasının ən populyar resursları demək olar ki, tam olaraq çökmüş vəziyyətdədir.

Apardığımız şəbəkə araşdırması zamanı məlum oldu ki, son bir neçə gün ərzində Azərbycan saytlarına DDoS-hücumlar iranlı hakerlər tərəfindən təşkil olunub. Araşdırma zamanı məlum olub ki, son günlər Azərbaycan saytlarının manşet xəbəri kimi verdiyi iranlı qadınlar haqqında qlamur xəbərləri bu hücumun başlıca səbəblərindəndir.

Qeyd edirik ki, hazırda Ölkə.az saytına da kütləvi hücumlar başlayıb. Saytın texniki heyəti DDoS-hücumların qarşısını almaq üçün gücləndirilmiş iş rejiminə keçib və əlavə tədbirlər görülür.

Ölkə.az, Monitorinq şöbəsi