Keçmiş icra başçısının qızı dələduzluq etdi

Dələduzluqda təqsirləndirilən və 8 illik həbs cəzası alan Nigar Abdullayeva barəsində olan hökmdən kassasiya şikayəti verib.

İşə Ali Məhkəmədə noyabrın 27-də baxılacaq. Proses hakim İmran Hacıqayıbovun sədrliyi ilə baş tutacaq.

Qeyd edək ki, Nigar Abdullayeva Salyan rayonunun keçmiş icra başçısı Seyran Seyranovun qızıdır. 1982-ci il təvəllüdlü N.Abdullayeva 2014-cü ilin sentyabr ayına kimi İqtisadi İnkişaf Nazirliyinin (hazırda İqtisadiyyat Nazirliyi) protokol şöbəsinin rəisi olub.

Məlumata görə, o, 500 min manat pulu dələduzluq yolu ilə ələ keçirməkdə təqsirləndirilir. Belə ki, ittihama görə, N.Abdullayeva turizm agentliyi qurmaq adı ilə 19 nəfərdən külli miqdarda pul alıb və qaytarmayıb. O, Cinayət Məcəlləsinin 178.3.2-ci (dələduzluq, külli miqdarda ziyan vurmaqla törədildikdə) maddəsi ilə ittiham olunur.

Xatırladaq ki, Nigar Abdullayeva 2015-ci il sentyabr ayının 22-də Bakı Ağır Cinayətlər Məhkəməsinin hökmü ilə 8 il müddətinə azadlıqdan məhrum edilib.
Hökmdən narazı qalan məhkum apellyasiya şikayəti ilə Bakı Apellyasiya Məhkəməsinə müraciət edib. N.Abdullayevanın apellyasiya şikayəti təmin edilməyib.