Millət vəkili: "Qarabağ problemini həll etməyə qoymayan Minsk qrupudur"
Finlandiya XİN-nin "Dağlıq Qarabağ münaqişəsinin həlli üçün lazım olan elementlər artıq mövcuddur" deməsini millət vəkili Zahid Oruc şərh edib.
Ölkə.az-a danışan millət vəkili bildirib ki, Qarabağ probleminin hazırkı dövrdə həlli ilə bağlı sənədin masa üzərində olması bəyanatını real hesab etmir.
"Münaqişənin həlli üçün zamanında həyata keçirilən tədbirlər tərəflər arasında təmas olmasından və onların baxışlarının bütünlükdə müəyyənləşməsinin təşkilindən ibarət idi. Ermənistan tərəfi maksimalist olaraq Qarabağ müstəqillik məsələsini ortaya qoyurdu, Azərbaycan tərəfi isə real mövqeni ifadə edirdi.
Belə bəyanatın verilməsi, yəni problemin həlli üçün müəyyən şərtlərin hazır olmasının deyilməsi əlbəttə ki, çox riskli bəyanatdır. İndiyə qədər biz MİNSK qrupunun həmsədirlərinin dilindən bu mövqeni eşitməmişik. Ən azı problemə onların münasibəti də tam Azərbaycan cəmiyyətinə və yaxud da erməni tərəfinə bəlli deyil.
Qarabağ probleminin hazırkı dövrdə həlli ilə bağlı sənədin masa üzərində olması bəyanatını real hesab etmirəm. Biz hamımız bunu arzulayırıq, ancaq düşünürəm ki, bir sıra məsələlərə beynəlxalq dairələrin özünün mövqeyi belə bəlli deyil. Ona görə də bu gün ATƏT-in MİNSK qrupu problemin həllini necə görməsini öncə özləri müəyyən etməlidir. Azərbaycan və Ermənistanın baxışı zatən bəllidir.
Bizi bu problemi həll etməyə qoymayan isə məhz MİNSK qrupudur. Bunu açıq şəkildə söyləmək lazımdır.
Biz zamanında ümid edirdik ki, məsələnin beynəlxalq müstəviyə daşınması problemin daha rahat həllini tapmasına kömək edəcək. İndi isə biz problemi onların əlindən alıb regional və məhəlli çərçivəyə sala bilmirik. İki dövlət arasındakı məsələ indi artıq Amerikanın Rusiyanın və Fransanın arasındakı davaya çevrilib".
Qeyd edək ki, Finlandiya XİN gərginliyin artdığı bir zamanda tərəflər arasında qarşılıqlı etimadı artıracaq bütün tədbirləri dəstəklədiyini və hər iki tərəfin təmkin nümayiş etdirməli olduğunu, bununla yanaşı yekun nizamlanma istiqamətində işlərin davam etdirilməsini bildirib.
Fatimə İbrahimova
Ölkə.az
