"Tutaq ki, Putin Kiyevi aldı, bəs sonra?"

Putinin "problem ondadır ki, əgər mən Kiyevi almaq istəsəm bunu cəmi iki həftəyə edərəm” bəyanatı və son günlər Ukrayna və Rusiya arasında baş verənləri politoloq Vəfa Quluzadə Ölkə.az-a şərh etdi.

Vəfa Quluzadə: "Çox asandır demək ki, mən iki həftəyə Kiyevi alaram. Putin ordusu 15 ildir ki, müharibəyə hazırlaşır. Rusiyanın çox böyük və güclü ordusu var. Ukraynanın ordusu isə Rusiyanın siyasəti nəticəsinə bərbad bir vəziyyətə düşüb. Rusiya Ukraynanı tamamilə işğal edəndən sonra nə olacaq? Rusiya Ukraynanı alsa belə bu qələbə olmayacaq. Putin Kiyevi aldıqdan sonra da Ukrayna müharibəyə davam edəcək. Ukraynalılar partizan müharibəsi edib rusları küçələrdə qıracaqlar. Ona görə də, Putin heç vax cəsarət edib Kiyevi ala bilməyəcək. Putinin fikri 1945-ci ilə getməsin. 1945-ci ildə Stalin Berlini almadı, Berlini Çörçil, Ruzvelt və Stalin birlikdə aldılar. O zaman koalisiya yarandı və bu koalisiya qələbə qazandı. İndi Rusiya təkdir, təklənmiş vəziyyətdədir. Həmin o vaxt SSRİ-nin Almaniyanı məğlub etməsinə kömək edən koalisiyanın üzvləri indi Rusiyanın əleyhinədir. Rusiya artıq sanksiyaların nəticəsində böyük zərbələr alır. Rusiyada qida çatışmamazlığı var, rubl məzənnədən düşüb. Rusiya sanksiyalara tab gətirə bilməyəcək və ona görə də Putin tələsir. Putin tələsib deyir ki, atəşkəs lazımdır, eyni zamanda Donetsk və Luqanska Ukraynanın tərkibində muxtariyyat verilməsini tələb edir. Ukraynaya təklif edilən muxtariyyət Qarabağ münaqişəsinin həllində Azərbaycana verilən şərtlərin eynisidir. Luqansk və Donetsk təklif edir ki, onlar Ukraynanın tərkibində bir şərtlə qala bilərlər ki, onların özlərinin ordusu olsun, iqtisadiyyatları Rusiyaya, "Gömrük ittifaqı"na yönəlsin, onların xaricdə təmsilçiliyi olsun. Bunlar isə müstəqil dövlət atributlarıdır.

Qarabağ məsələsinin həlli ilə bağlı status danışıqlarını Heydər Əliyevin tapşırığı ilə mən aparırdım. O zaman ermənilər də eynilə bu şərtləri bizə irəli sürmüşdülər. Ukrayna ilə müharibədə Putin məğlub olacaqdır. Mənim buna şübhəm yoxdur çünki qələbə mümkün deyil. Putin istəyir ki, orda da dondurulmuş bir münaqişə yaratsın, Donetskdə də Dağlıq Qarabağdakı kimi atəşkəs imzalasın və "de fakto" Ukraynadan ayrı olub Rusiya ilə bir olsun. Qərb də bunun əleyhinədir və ona görə də sanksiyaları günü-gündən gücləndirir.

Son zamanlar cəbhədəki gərginliyi təşkil edən Rusiya olub, bu heç kimə sirr deyil. Cəbhə xəttində ermənilərə istehkamlar tikən Rusiyadır. Kazimirov bir dəfə mənə demişdi ki, biz erimənilərə elə istehkamlar tikmişik ki, siz ora hücum etmək istəsəniz oranı ala bilmiyəcəksiniz, ya da böyük itki verəcəksiniz. Rusiya imperiyası çöküş qarşısında qalıb, ona görə də Ukraynaya hücum edib. Putin deyir ki, bizə hücum edən olsa ona çox pis olacaq. Rusiyaya hücum edən kimdir? Əksinə Rusiya hücum edib və hücumun nəticləri onun üçün ağır olub və getdikcə də ağırlaşacaq".

Səxavət Məmməd

Ölkə.az