Çenin qızı: "Atam yaşasaydı, ABŞ-la danışıqları dəstəkləyərdi"

Çe Qevaranın qızı ABŞ-la münasibətlərdən danışıb.

Ölkə.Az xəbər verir ki, əfsanəvi Çe Qevaranın qızı Aleyda Qevara ABŞ-la Kuba arasında 53 il əvvəl kəsilən əlaqələrin yenidən canlanması barədə danışıb.

"Atam sağ olsaydı danışıqlara dəstək verərdi", - deyə Aleyda bildirib.

Bu il Vankuverdə təşkil edilən Beynəlxalq Çe Qevara Konfransına qatılmaq üçün Kanadaya gedən Aleyda Qevara Kuba ilə ABŞ-ın yaxınlaşmasını müsbət qarşıladığını söyləyib. "Sputnik"-də yer alan xəbərə görə, tərcüməçisi vasitəsilə jurnalistlərə danışan Qevara atasının "ABŞ insanlığın ən böyük düşmənidir" ifadəsinin xatırlanmasından sonra bildirib ki, atası sağ olsaydı, danışıqlara açıq olardı.

Xatırladaq ki, bir neçə gün öncə Çe Qevaranın nəvəsi, yazıçı Kanek Sançes 40 yaşında ağır ürək əməliyyatından sonra Mexikoda dünyasını dəyişmışdı. O, Çe Qevaranın qızı İldita və meksikalı Albeto Sançesin oğlu idi. Sançes Kuba inqilabını tənqid etməsi ilə məşhur idi.

Rəşid Mustafazadə

Ölkə.Az