İranla Azərbaycan arasındakı ticarət dövriyyəsi artacaq

"İranlı nazirin bu səfəri iki ölkə arasında olan ticarət dövriyyəsinin artırılması üçündür"

İran İslam Respublikasının iqtisadiyyat və maliyyə naziri Əli Təyyibniyanın Bakıya səfərinin vaxtı açıqlanıb. Xəbər verdiyimiz kimi Ə.Təyyibniya Azərbaycanın iqtisadiyyat və sənaye naziri Şahin Mustafayevin rəsmi dəvəti ilə Bakıya yanvarın 28-də səfər edəcək.

Sözügedən səfəri Ölkə.az-a danışan Neft Araşdırmaları Mərkəzinin rəhbəri İlham Şaban şərh edib. Onun fikrincə, neft qiymətinin sürətli düşüş etdiyi bir vaxtda iqtisadiyyat və maliyyə nazirinin ölkəmizə səfəri iki ölkə arasında ticarət dövriyyəsinin azalmasının qarşısının alınmasına hesablanıb.

"Nazirin səfəri İranla Azərbaycan arasında iqtisadi əlaqələrin genişlənməsi bölümündədir. Çünki ötən il iki ölkə arasında ticarət dövriyyəsi kəskin sürətdə eniş nümayiş etdirdi. Xatırladım ki, 2012-2013-cü illərlə müqayisədə çox aşağı rəqəm qeydə alınmışdı. Bu illər ərzində ticarət dövriyyəsi 550 mln civarında idisə, ötən il təqribən 250 mln dollara qədər eniş baş verdi. Yəni bu, təqribən 50%-lik aşağı bir göstərici idi.

Təbii ki bu da obyektiv səbəblər üzündən baş vermişdi. Ona görə ki, İrana qarşı sanksiyalar tətbiq olunmuşdu. Bunlar da təbii ki, ticarətə mənfi təsir edən amillərdir.

Yəqin ki, İran tərəfi də bu məsələlərin aradan qaldırma yönümündə öz təkliflərini Azərbaycan tərəfinə çatdırmaq istəyir. Başqa bir tərəfdən də Azərbaycan bazarının tələbləri də artıq başqadır. Biz getdikcə daha keyfiyyətli mallara özümüzü alışdırırıq. Azərbaycan bazarında İran mallarının nə qədər rəqabətə davamlı ola bilmə məsələsi də var.

Düşünürəm ki, İranın bu səhəri iki ölkə arasında olan ticarət dövriyyəsinin azalmasının aradan qaldırılmasına hesablanan addımdır".

Qeyd edək ki, səfər zamanı tərəflər arasında iqtisadi əlaqələrin inkişafı məsələsi müzakirə olunacaq.

Fatimə İbrahimova
Ölkə.az