Sərdar Cəlaloğlu: "Almaniya əlində olan iqtisadi gücdən istifadə edir"

Almaniya kansleri Angela Merkel Mariupolun atəşə tutulmasını “sülh sazişinin aşkar və əsassız pozulması” adlandırması barədə xəbər vermişdik.

Hazırda bir çox politoloqrın da dediklərini nəzərə alsaq, Almaniya və Rusiya arasında xüsusi gərginlik müşahidə olunur.

Məsələni Ölkə.az-a siyasətçi Sərdar Cəlaloğlu şərh edib.

"Almaniya AB-nin əsas aparıcı dövlətidir. Yəni AB-nin saxlanmasına, bura üzv olan ölkələrin iqtisadi inkişafında müstəsna rol oynayan Almaniyadır. Ümumiyyətlə biz baxsaq görərik ki, bəşər tarixinin son 100 ilində almanlar demək olar ki, tarix yazan xalqlardan olub. Bu gün də avropanın əsas aparıcı qüvvəsi almanlardır. Onların Avropada söz sahibi olduğunu, Avropaya görə məsuliyyət daşıdığını, onun təhlükəsizliyində inkişafında maraqlı olduğunu göstərir. Ukrayna da Avropa sərhədlərində olan bir ölkədir və AB-ə üzv olmaq istəyir.

Ukrayna hadisələri Almaniyaya çox yaxın yerdə baş verir. Sözügedən ərazidə müəyyən sayda etnik almanlar yaşayır. Ukraynada baş verən hadisələr, eləcə də dünyada Avropanın taleyinə təsir edən məsələlərlə bağlı Almaniya söz sahibi kimi çıxışında əlində olan iqtisadi gücdən, potensialdan və siyasi nüfuzdan istifadə edir. Almaniya kanslerinin həm Qarabağla bağlı məsələdə, həm Ukrayna ilə bağlı məsələdə mövqeyi də məhz buna bağlıdır. Yəni Avropa öz maraqlarını bu cür təmin edir".

Qeyd edək ki, ötən gecə Almaniya başçısı Ukrayna və Rusiya prezidentləri ilə ayrıca telefon söhbətlərində olub.Telefon danışığı zamanı Vladimir Putindən Ukraynada zorakılığının şiddətlənməsinin qarşısını alması tapşırılıb.

Almaniya kansleri Angela Merkeldən sonra Fransa prezidenti Francois Hollande da Putinə qarşı eyni tələblə müraciət edib.

Fatimə İbrahimova
Ölkə.az