"Səni axtarıram"da axtarılan manyakı polis saxladı

 "Ölkə.Az"ın məlumatına görə, F.Bağırovun qızı Aytac Bağırova sözügedən proqrama müraciət edərək, atasının manyak olduğunu və ailə üzvlərini öldürmək istədiyini bildirmişdi. Sonradan məlum olmuşdu ki, Bağırov bir neçə gündür Daşkəsən meşələrində gizlənir. Sonradan qızına və həyat yoldaşına xəbər göndərən şəxs onların öldürməyincə sakitləşməyəcəyi ilə hədələmişdi. 

Daxili İşlər Nazirliyinin Mətbuat xidmətinin Gəncə Regional qrupundan "Ölkə.Az"a verilən məlumata görə, sentyabrın 13-də saat 19:00 radələrində Daşkəsən rayonu Tapan kəndində yaşayan İlyas Bağırov və Tamara Bağırovanın küt və kəsici alətlərlə döyülərək çoxsaylı xəsarətlər alması barəsində Daşkəsən rayon Polis Şöbəsinə daxil olan məlumatla əlaqədar dərhal hüquq mühafizə orqanlarının əməkdaşları tərəfindən müvafiq tədbirlər görülüb.

Faktla əlaqədar Cinayət Məcəlləsinin 126.2.1 və 126.2.3-cü maddələri ilə cinayət işi başlanılıb.

Həyata keçirilən istintaq və əməliyyat-axtarış tədbirləri nəticəsində hadisəni törətməkdə şübhəli bilinən zərərçəkənlərin övladı Firdovsi Bağırov saxlanılıb. İlkin araşdırmalar zamanı hadisənin təqsirləndirilən şəxsin içkili olması və şəxsi münasibətlər zəmnində baş verdiyi müəyyən olunub. İfadəsində Firdovsi tutduğu əməldən peşman olduğunu qeyd edib. Hazırda faktla bağlı araşdırmalar davam etdirilir.

Qeyd edək ki, "Səni axtarıram"ın bugünükü buraxılışında sözügedən məsələ də müzakirə olunacaq.

İntiqam VALEHOĞLU
Ölkə.Az