Boko Haram qatil-uşaqlar hazırlayır

Nigeriya ordusu terrorçulardan qorxur

“The Daily Mail” Boko Haram terror qrupunun azyaşlı uşaqları qatilə çevirməsi haqqında geniş yazı hazırlayıb. Qəzet bildirir ki, terrorçular təlim keçdikləri bu uşaqların islam adına öldürməsi üçün hər şeyə gedirlər. Həmin təlimlərdən hazırlanmış fotolar isə təbliğat vasitəsi kimi yayımlanıb. Aydın görünür ki, onlarla uşaq avtomat silahlarla necə nişan almağı öyrənirlər. Ehtimal edilir ki, həmin fotolar Nigeriyanın şimalında çəkilib. Çünki Boko Haram əsasən həmin ərazilərdə aktiv fəaliyyətdədir.

Rəsmi məlumatlara görə, Boko Haram 2014-cü ildə 10 min insanın ölümünə səbəb olub.

“Human Rights Watch” təşkilatı bəyan edib ki, Boko Haram müxtəlif yerlərə düzənlədiyi hücumlar zamanı belə təlim keçmiş uşaqları ön sırada yerləşdirir.

Təlim keçən uşaqların fotosu terrorçulara məxsus olan “Al Urwa al Wuthaqa” saytında paylaşılıb.

Britaniya nəşri bildirir ki, Boko Haram bu günlərdə 30 uşaq oğurlamışdı, onların arasında qız uşaqları da var. Oğurlanmış uşaqların yaşı isə 11-dən aşağı idi. Adamava vilayətində isə onlar 40 qadını əsir aparıb.

Bu faktdır ki, Nigeriyanın mərkəzi və yerli hökumətləri xalqı Boko Haramın hücumlarından qorumaq iqtidarında deyil. Elə ona görə də, Nigeriyaya BMT-nin hərbi kontingentinin yeridilməsinin vacibliyi getdikcə daha tez-tez eşidilməyə başlayır. Qeyd olunur ki, Nigeriya ordusu son dərəcə zəifdir, terrorçulardan çəkinir və hökumətin qarşıya qoyduğu tapşırığı icra etmək gücündə deyil. (musavat)

Ölkə.Az