Litvada qondarma xalq respublikası yaratmaq istəyirlər

Litvada "Vilensk Xalq Respublikası" adlı səhifə üzvləri artır.

Ölkə.Az xəbər verir ki, Facebook şəbəkəsində yaradılmış "Wileńska Republika Ludowa - Vilensk Xalq Respublikası" adlı səhifə aləmi qarışdırıb.

Belə ki, səhifə yaradıcıları qondarma Donetsk və Luqansk xalq respublikalarına dəstək verib. Onlar Litvada referendumun keçirilməsini tələb edir. Səhifədə Litvanın siyasətini pisləyən müxtəlif keçidlər paylaşılır. Yanvarın 29-u "Wileńska Republika Ludowa - Vilensk Xalq Respublikası" səhifəsində qədim Qediminas qalasının fotosu yerləşdirilib.

"Tezliklə polyak şəhəri üzərində bu qəribə bayraq qalmayacaq", - deyə polyak dilində şəklin izahında yazılıb.

Xatırladaq ki, Baltikyanı ölkələrdə bu, ilk separatçı meylləri deyil. Belə ki, xəbər verdiyimiz kimi, Latviyanın təhlükəsizlik polisi sosial şəbəkələrdə "Latqal Xalq Respublikası" ideyasının yayılması faktı üzrə yoxlamalara başlamışdı.

Facebook sosial şəbəkəsində "Latqal Xalq Respublikası" yazılı bayraq şəkli və Latviyadan ayrılmış Latqaliyanın xəritəsinin yayılması ölkədə rezonans doğurmuşdu. Təhlükəsizlik polisindən qeyd etmişdilər ki, ictimai məkanlarda Latviyanın ərazi bütövlüyü prinsipini şübhə altına salan fikirlərin yayılması birbaşa Rusiyanın geosiyasi maraqlarına xidmət edir.

Rəşid Mustafazadə

Ölkə.Az