Bakıda keçmiş məhkumlar söyüş üstündə bıçağa əl atdılar

“Ölkə.Az”ın məlumatına görə, cinayət məcəlləsinin 29.120.2.7-ci maddəsi ilə təqsirləndirilən Kazımov Məhərrəm İmanverdi oğlunun məhkəmə prosesinə hakim Novruz Kərimov sədrlik edəcək. Cinayət işində Paşayev İlham Ədil oğlu və İsmayılov Mahir Etibar oğlu zərərçəkmiş qismində tanınıb. 

Belə ki, noyabrın 13-də gecə saatlarında Sabunçu qəsəbəsində, əslən Zəngilan rayonundan olan, əvvəllər cinayət məcəlləsinin 177-ci maddəsi (oğurluq) ilə məhkum edilmiş 1986-cı il təvəllüdlü Paşayev İlham Adil oğlu və eyni maddə ilə əvvəllər məhkum edilmiş 1987-ci il təvəllüdlü Bakı sakini İsmayılov Mahir Etibar oğlu naməlum şəraitdə çoxsaylı bıçaq zərbələri alıblar.

Ekspertlər yoxlama zamanı Paşayevin bədəninin müxtəlif hissələrində çoxsaylı bıçaq xəsarətləri aşkar ediblər. Hadisəni törədən şəxs İsmayılovun boğazını kəsməyə cəhd edib. Hər iki yaralı ağır vəziyyətdə 3 saylı şəhər Kliniki Xəstəxanasının reanimasiya şöbəsinə yerləşdirlib, onların vəziyyəti ağır kimi qiymətləndirilir. 

İlkin araşdırma zamanı məlum olub ki, sözügedən şəxslərə əvvəllər məhkum edilmiş Məhərrəm Kazımov adlı şəxs bıçaqla hücum edib. Səbəb isə yeyib-içdiyi məhkum yoldaşlarının onu təhqir etmələri olub. Hüquq-mühafizə orqanlarının məlumatına görə, şübhəli şəxs zərərçəkənləri öldürmək məqsədi güdüb. 

Qeyd edək ki, saxlanılan M.Kazımov Mahir və İlhamla birgə həbsxana həyatı yaşayıb.

Natiq Allahverdiyev
Ölkə.Az