\"Sanki Fədayə Laçın qatı cinayətkardır\"

"Ölkə.Az" axşam.az-a istinadən bildirir ki, hakim Azad Məcidovun sədrliyi ilə keçirilən prosesdə hökm oxunub. Məhkəmənin hökmü ilə müğənni Fədayə Laçın 5 il müddətinə azadlıqdan məhrum olunub.

Bununla bağlı əməkdaşımız sənətçinin bacısı İlahə Fəda ilə danışıb. O, "Fədayənin vəkili var, hər şeyi ondan soruşun, bu mövzuda mən heç nə danışmayacam" sözlərini deyib.

Daha sonra F.Laçının vəkili Türkəl Süleymanlı ilə əlaqə saxlanılıb. O, məhkəmə qərarı ilə razı olmadıqlarını bildirib:

"Apellyasiya şikayəti edəcəyik. Heç bir güzəşt nəzərə alınmadı. Fədayə Laçına sanki qatı cinayətkarmış kimi iş verildi. Onun ailə durumu çətindir, tək övlad anasıdır. Sənətkardır və o qədər sənət adamı müraciət etdi, heç biri nəzərə alınmadı. Onun etdiyi cinayətdə 2 aydan 6 ilədək həbs cəzası var. Ona isə 5 il verildi. Demək olar ki, prokurorun istəyindən cəmi 1 il güzəşt edildi".

Vəkil onu da əlavə edib ki, F.Laçın özü də qərara etirazını bildirib. 

Xatırladaq ki, prokuror çıxışında təqsirləndirilənlər - müğənni F.Laçının 6 il, Penitensiar Xidmətin tabor komandiri Bəhruz Abdullayevin 10 il, qarovul rəisi Ceyhun Səmədovun 10 il, müavinləri - Tural Poladxanovun 8 il 6 ay, Fuad Hacıyevin 8 il 6 ay, taksi sürücüsü Məhəmməd Hacıyevin 8 il, Günay Atakişiyevanın 7 il, Aqil Nəcəfovun 10 il, İsrafil Soltanovun 8 il, Şahmar Bəyəlizadənin 8 il, Tərlan Zeynalovun 8 il, Anar Əsgərovun 8 il və Əli Ağaminin (cəzaları birləşdirilib) 20 il müddətinə azadlıqdan məhrum edilməsini istəmişdi.

Qeyd edək ki, ötən il oktyabrın 23-də Bakıda məhbusların qaçması faktı ilə bağlı Baş Prokurorluğun Ağır Cinayətlərə Dair İşlər üzrə İstintaq İdarəsində başlanan cinayət işi üzrə Fədayə Məmmədova (Fədayə Laçın) təqsirləndirilən şəxs qismində cəlb olunaraq Nəsimi Rayon Məhkəməsinin qərarı ilə barəsində həbs qətimkan tədbiri seçilib.

İttiham aktına əsasən, 7 nəfər - Müzəffər Məmmədov, Emil Səfərov, Ramil Səlimov, Hətəm Əliyev, Vüsal Abbasov, Rövşən Camalov və Rəşad Məmmədov zərərçəkmiş şəxs qismində tanınır.

Ölkə.Az