Həyatımızın aynası

Doğrusu, mavi ekran vasitəsilə hər ötən günümüzün obrazlı ifadəsini yaratmağa, hər ötən günlə bağlı dolğun təsəvvür formalaşdırmağa peşəkarlıqdan qaynaqlanan mühüm məsələ kimi baxıram. Onu da bilirəm ki, etibar edilən bu möhtəşəm missiyanın öhdəsindən yalnız öz işinə ciddi yanaşanlar ustalıqla gəlirlər.

Evimizin daimi “qonağı” hər dəfə eyni səmimiyyətlə, eyni doğmalıqla qarşılanırsa, deməli, süfrəmizin başında oturmağa, bizimlə qulaq yoldaşı olmağa haqq edir və bu haqqı kiminsə onun əlindən alacağına ümid yeri qoymur. Çünki etibarımızı qazanıb, həyatımızın ayrılmaz bir parçasına çevrilib.

Düzdür, hər kəsin öz mövzusu, hər kəsin öz seçimi var. Söz azadlığı müxtəlif insanların təfəkküründə, dünyagörüşündə, həyata baxışlarında müxtəlif effektlər, reflekslər yaradır, müxtəlif təsəvvürlər formalaşdırır. Yəni, istəsək də, istəməsək də mavi ekran hərəyə öz zövqünə, öz marağına görə doğmadır, yaxındır. Bu doğmalığın, bu yaxınlığın ekran ünvanı çeşidinə, rəhgarəngliyinə görə fərqlənsə də, qismən böyük auditoriyanı əhatə edən mövzular, etiraf edim ki, barmaqla sayılacaq qədər azdır.

Bu mənada daha çox İctimai Televiziyanı gərgin və ağır informasiya rəqabətinin şəriksiz qalibi kimi tanımaq, həyatımızın baş qəhrəmanı obrazında görmək adi hala çevrilib. Çünki məhz bu ekran əsərində eyni mövzuya müxtəlif rakurslardan yanaşmanın, fikir rəngarəngliyinin, zəngin və məzmunlu informasiya blokunun şahidi oluruq.

Ən əsası isə, İctimai Televiziya qısa zaman kəsiyində toplumun mental dəyərlərinə, arzu və istəklərinə hörmət və ehtiramla yanaşmaq kimi önəmli missiyanı tanıdı, tanıtdı və tanındı...

Son günlər cəbhədə verdiyimiz itkiləri - hamımızın dərin kədərinə, ürək ağrısına çevrilən məlum hadisələri və bu hadisələrin fonunda baş verənləri xatırlayıram. Bu kədəri, bu ağrını hamımızın eyni şəkildə yaşamadığımız çağdaş dünyamızın acı reallığıdır. O ağır günlərdə bəh-bəhlə ad günü keçirən xalqsız xalq “artist”lərini, mavi ekranlardakı çal-çağırı izləyə-izləyə, sinəsinə övlad dağı vurulan Vətənin yaşarmış gözlərinə baxmaq çox ağır idi, çox... O kədərli günlərdə bizim bəlkə də yeganə təsəllimizə çevrilən, dərdimizə şərik çıxan isə İctimai Televiziya oldu. Mən ekran mütəxəssisi deyiləm, amma həmin günlərdə qeyri-ixtiyari ekran izləmələrim bu qənaətimin əsas motivinə çevrildi: xalqın hüznlü günündə İctimai Televiziyanın zəruri proqram redaktələrini görməmək mümkün deyildi...

İnformasiya işinin təşkilində, xəbər bloklarının məntiqli süjet xətti boyunca düzülməsində də İTV digər potensial “rəqib”lərini xeyli qabaqlayır. Onun ifasında təqdim edilənlər yalnız maarifçilik məfkurəsilə deyil, həm də dilimizin dolğunluğu, saflığı və yükü ilə fərqlənir. Ekranda gördüklərimiz bir qayda olaraq ciddi redaktələrlə - “təmizlənmiş” qısa və lakonik mətnlərin müşaiyətilə təqdim olunur. Bu mətnlərin təhlilə, analizə və tənqidə meylliliyi isə ekran effektini ikiqat artırır. Və bu vaxt xəbərlərin rəngarəngliyi, məkan genişliyi də istər-istəməz diqqətdən yayınmır. Qısa zaman kəsiyində ən ucqar bölgələrimizdən tutmuş başkəndimizə - paytaxtımızadək bütün iqtisadi, sosial, siyasi və mədəni hadisələr haqqında tamaşaçıya dolğun informasiya çatdırmaq, əlbəttə, ağır və məsuliyyətli işdir.

Fikrimcə, İstimai Televiziya informasiya texnologiyalarının ən müasir inkanlarından əhəmiyyətli dərəcədə bəhrələnməklə, bu işin də öhdəsindən uğurla gəlir.

Regionların iqtisadi inkişafına, idman sahəsinə və gənclərin yaradıcılıq imkanlarının genişlənməsinə özəl münasibət, təhsil islahatlarının işıqlandırılması və s. və i. bütün bunlar haqqında danışdığımız ekran məkanı üçün səciyyəvi xarakter daşıyan mühüm cəhətlərdəndir. Bu arada ölkəmizdə hələ təzə-təzə formalaşan ənənələrə, xüsusilə, turizm sahəsinə ayrıca ekran zamanının ayrılması da diqqətçəkən məqamlardandır. Bütün bunlar istər iqtisadiyyatda, istər idmanda, istərsə də digər sahələrdə aparılan dövlət islahatlarını stimullaşdırır, xalqın, xüsusilə də, gənclərin gələcəyə inamını daha da artırır. Eyni fikirləri beynəlxalq aləmdə baş verən mühüm hadisələrin işıqlandırılması haqqında da söyləmək olar.

Elə ona görə də, tələbkar tamaşaçıların əhəmiyyətli hissəsi bir qayda olaraq öz evinə hər gün İctimai Televiziyanı qonaq çağırır...

İbrahim RÜSTƏMOV,
əməkdar jurnalist,
ehtiyatda olan polkovnik-leytenant

Ölkə.Az