Kerri: "Ukrayna birtərəfli atəşkəsə riayət etməməlidir"

ABŞ-ın dövlət katibi Con Kerri Kiyevdə verdiyi brifinq zamanı Donbasda baş verən hadisələri və bu böhran ətrafında gedən diplomatik danışıqları şərh edib.

Ölkə.az "Ukrinform" agentliyinə istinadən xəbər verir ki, Kerri böhranın sülh yolu ilə həll edilməsindən danışaraq hər iki tərəfi buna nail olmaq üçün əlindən gələni etməyə çağırıb.

"Bu böhranı həll etmək üçün yeganə yol diplomatiyadır. Bizim Ukrayna böhranının həlli üçün hərbi yol olduğu illüziyası belə yoxdur. Problem sülh yolu ilə həll olunmalıdır və bu sülh birtərəfli, yəni yalnız Ukraynanın riayət etdiyi sülh olmamalıdır. Hər iki tərəf buna riayət etməlidir", deyə Kerri bildirib.

Daha sonra ABŞ-ın dövlət katibi vurğulayıb ki, Rusiya böhrandan çıxmaq, ABŞ və Avropa ilə yaxınlaşmaq üçün bütün şanslarını hələ itirməyib.

"Bizim bir xahişimiz və tələbimiz var ki, Rusiya və Donbas separatçıları Minskdə əldə olunmuş razılığa riayət etsinlər, atəşi dayandırsınlar, silah, sursat, hərbi texnika və xarici hərbçiləri Ukrayna ərazisindən çıxartsınlar. Girovları azad etsinlər, Ukraynanın dövlət sərhədlərinə hörmətlə yanaşsınlar. Belə olan halda mən söz verirəm ki, ABŞ əldə olunancaq sülhün qarantı kimi onun qorunması üçün əlindən gələni edəcəkdir", deyə Kerri sözlərini bitirib.

Ölkə.az