Azərbaycan əsilli aktrisadan İrana çılpaq etiraz
Azərbaycan əsilli İran aktrisası Gülşiftə Fərahani Fransanın "Egoiste" jurnalı üçün tamamilə çılpaq çəkilib.
Ölkə.Az "Huffingtonpost.fr"a istinadən xəbər verir ki, İrandan qovulmuş azərbaycan əsilli Hollivud aktrisası Gülşiftə Fərahani növbəyi dəfə Tehran rəhbərliyinə itaətsizlik mesajı verib. O, Fransanın məşhur "Egoiste" jurnalının üz qabığı üçün tamamilə çılpaq çəkilib. Bu barədə məlumat dünən fransız KİV-lərində yer alıb.
"Fransa məni azad etdi. Paris dünyada qadınların özlərini günahkar hiss etmədikləri yeganə yerdir. Şərqdə siz hər zaman günahkarsınız. İlk seksual impulslarınızı hiss edən kimi", - deyə 31 yaşlı Fərahani bildirib.
Bir çox kino mükafatlarının qalibi olan Gülşiftə Fərahani 2009-cu ildə digər fransız aktyorları ilə birlikdə "César Award's" üçün hazırlanmış videoya yarıçılpaq çəkildikdən sonra İranın İslami İrşad və Mədəniyyət Nazirliyi tərəfindən vətəninə qayıda bilməyəcəyi barədə xəbərdarlıq edib. Nazirliyin xəbərdarlığında "İran dövlətinin sizin kimi aktyor və aktrisalara ehtiyacı yoxdur, gedin sənətinizi başqa yerlərdə davam etdirin", - deyə bildirilib.
O, 2007-ci ildə amerikalı məşhur aktyor Leonardo Di Kaprio ilə çəkildiyi "Bir ovuc yalan" ("Body of Lies") filmində başını örtmədiyi üçün İran hökumətinin təzyiqləri ilə üzləşib və Fransanın "Madame Le Figaro" jurnalında çılpaq şəkillərini dərc etdirdiyi üçün İranda arzuolunmaz şəxs elan olunub.
Gülşiftə Fərahani bundan sonra sosial şəbəkələrdə İran və Yaxın Şərq ölkələrində qadağalara etiraz etdiyi üçün ona heyranlıqlarını bildirən mesajlar aldığını bildirib. Gülşiftə Fərahani İran hökumətinin kino sahəsinə tətbiq etdiyi çoxsaylı təzyiqlərə etiraz olaraq Fransaya köçüb.
Qeyd edək ki, İranlı Hollivud aktrisası olan Gülşiftə Fərahani əslən Cənubi Azərbaycanın Həmədan vilayətindən olan Azərbaycan türküdür. Onun atası Behzad Fərahani və bacısı Şəqayiq Fərahani da kino və televiziya oyunçularıdır.
P.S. Gülşiftənin Azərbaycan türkcəsində oxuduğu mahnının videosu:
Rəşid Mustafazadə
Ölkə.Az
